काठमाडौं । नेपालमा केही दिनदेखि तापक्रम बढ्दै गएको छ । आउँदा दिनमा अझै तापक्रम बढ्ने पूर्वानुमान छ । मौसम पूर्वानुमान महाशाखाका अनुसार अबको तीन दिन तातो हावा चल्नेछ । आज (शुक्रबार)देखि आइतबारसम्म तापक्रम बढ्ने र तातो हावा चल्ने महाशाखाले जनाएको छ । 

महाशाखाले शुक्रबार बेलुका सार्वजनिक गरेको २० स्थानको विवरणमध्ये तीन ठाउँको तापक्रम ४० डिग्री सेल्सियसभन्दा माथि छ । 

महाशाखाले नेपालगञ्जको अधिकतम तापक्रम सबैभन्दा बढी ४१.१ डिग्री सेल्सियस मापन गरेको छ । बिहीबार नेपालगञ्जको अधिकतम तापक्रम ४०.५ डिग्री सेल्सियस मापन गरिएको थियो । 

यता धनगढीको अधिकतम तापक्रम पनि बिहीबारको तुलनामा शुक्रबार बढेको छ । आज धनगढीको अधिकतम तापक्रम ४०.७ डिग्री सेल्सियस मापन गरिएको छ । बिहीबार भने ४० डिग्री सेल्सियस मापन गरिएको थियो । 

भैरहवाको अधिकतम तापक्रम भने बिहीबारको तुलनामा केही कम मापन गरिएको छ । भैरहवाको अधिकतम तापक्रम शुक्रबार  ४०.२ डिग्री सेल्सियस मापन गरिएको छ । बिहीबार भने ४१.४ डिग्री सेल्सियस मापन गरिएको थियो । 

बिहीबारको तुलनामा शुक्रबार काठमाडौंको अधिकतम तापक्रम भने थोरै कम छ । काठमाडौंको अधिकतम तापक्रम शुक्रबार ३२.३ डिग्री सेल्सियस मापन गरिएको छ । बिहीबार भने अधिकतम तापक्रम ३३ डिग्री सेल्सियस मापन गरिएको थियो । 

त्यस्तै, दिपायलको अधिकतम तापक्रम ३९.८ डिग्री सेल्सियस, वीरेन्द्रनगरको ३८.५, जनकपुरको ३८.२, घोराहीको ३८, सिमराको ३७.३ डिग्री सेल्सियस मापन गरिएको महाशाखाले जनाएको छ ।  

महाशाखाले हरेक दिन बिहान पौने ९ बजे न्यूनतम र बेलुका पौने ६ बजे अधिकतम तापक्रम मापन गरी वेबसाइटमार्फत विवरण सार्वजनिक गर्ने गर्छ ।