काठमाडौं । इन्डियन प्रिमियर लिग (आईपीएल)मा दिल्ली क्यापिटल्सले लखनउ सुपर जायन्ट्सविरुद्ध १९ रनको जित निकालेको छ । मंगलबार दिल्लीमा भएको खेलमा घरेलु टिमले प्रस्तुत गरेको २०९ रनको लक्ष्य पछ्याउने क्रममा लखनउले २० ओभर नै ब्याटिङ गरे पनि नौ विकेट गुमाएर १८९ रनमात्र बनाउन सक्यो ।

लखनउका निकोलस पुरनले २७ बलमा ६ चौका र चार छक्कासहित ६१ रन बनाए पनि टिमको हार टार्न सकेनन् । अर्शद खानले ३३ बलमा तीन चौका र पाँच छक्कासहित ५८ रन बनाए । युद्धविर सिंहले १४ र क्विन्टन डी ककले १२ रन थपे ।

दिल्लीका इशान्त शर्माले तीन विकेट लिए । खलिल अहमेद, अक्षर पटेल, मुकेश कुमार, कुलदीप यादव र ट्रिस्टान स्टुब्सले समान एक विकेट हात पारे ।

त्यसअघि टस हारेर ब्याटिङमा आएको दिल्लीले निर्धारित २० ओभरमा चार विकेट गुमाएर २०८ रनको योगफल खडा गरेको थियो । दिल्लीका अभिषेक पोरेलले ५८ रन बनाए । ट्रिस्टान स्टुब्सले ५७, साई होपले ३८, कप्तान ऋषब पन्तले ३३ र अक्षर पटेलले १४ रन थपे ।

लखनउका नविन उल हकले दुई विकेट लिए । अर्शद खान र रवि बिस्नोईको नाममा एक–एक विकेट रह्यो ।

जितसँगै १४ खेलबाट १४ अंक जोडेको दिल्ली तालिकाको पाँचौँ स्थानमा छ । प्रतियोगितामा लिग चरणको आफ्नो अन्तिम खेल खेलेको दिल्लीको अब प्लेअफ पुग्ने गणितीय सम्भावनामात्र बाँकी छ । यता, १३ खेलबाट १२ अंक जोडेको लखनउ तालिकाको सातौँ स्थानमा छ ।