काठमाडौं । एकैदिन रिलिजको तयारी गरिएका नेपाली कथानक चलचित्र ‘पुजार सार्की’ र ‘फर्की फर्की’ दुवैको बलियो सम्भावना देखिएको छ । ‘पुजार सार्की’को ट्रेलरले सम्भावना देखाएको हो । ‘फर्की फर्की’मा स्टारडम देखिएको छ ।

‘पुजार सार्की’को ट्रेलर रिलिजपछि सिनेमाप्रति दर्शकको अपेक्षा बढाएको छ । ट्रेलरमा चलचित्रका मुख्य पात्रत्रय प्रदीप खड्का, आर्यन सिक्देल र पल शाह चरित्र अभिनयमा देखिएका छन् । उनीहरूमार्फत निर्देशकले जातीय विभेदको कथा भन्ने प्रयास गरेको ट्रेलरमा देखिएको छ । कथित उचनिच, प्रेम र द्वन्द्व (सामाजिक क्रान्ति) समेटिएको ट्रेलर अपेक्षा जगाउन सफल छ ।

यता, एक वर्षभन्दा धेरै समय कुनै चलचित्रमा काम नगरेका अनमोल केसीको स्टारडम चलचित्र ‘फर्की फर्की’को ट्रेलरमा देखिएको छ । लामो समय सिनेमाका पब्लिसिटी कन्टेनमा खासै आकर्षण नदेखिएको क्रमलाई यसले भंग गरेको छ । ‘फर्की फर्की’को ट्रेलरले २४ घण्टामा १० लाख भ्युज पाएको थियो । तीन हप्तामा ३० लाखभन्दा धेरैले ट्रेलर हेरेको देखिएको छ ।

‘फर्की फर्की’को ट्रेलरमा प्रोडक्सन भ्यालु उच्च देखिएको छ । सामाजिक सञ्जालमा यसको प्रशंसा समेत भइरहेको छ । प्रोडक्सन भ्यालु र अनमोलको ‘क्रेज’का कारण पनि यो सिनेमाले सम्भावना देखाएको छ ।

‘फर्की फर्की’मा अनमोलसँगै जसिता गुरुङ, रभी काफ्ले, समृद्धि अर्याललगायत कलाकार मुख्य भूमिकामा छन् । सुयोग गुरुङ निर्देशित चलचित्रको निर्माता रोहित अधिकारी हुन् ।

प्रदीप, आर्यन र पलसँगै अञ्जना बराइली, परीषा लिम्बू, प्रेम सुब्बा, लोकेन्द्र लेखक मुख्य भूमिकामा रहेको चलचित्र ‘पुजार सार्की’ दिनेश राउतले निर्देशन गरेका छन् । सुवास भुसाल यो सिनेमाका निर्माता हुन् ।

कन्टेनले आकर्षण गरेका सबै चलचित्र राम्रा हुन्छन् र दर्शकले मन पराउँछन् भन्ने छैन । यसअघिका उदाहरणले पनि यो पुष्टि गरिसकेको छ । पछिल्लो समय पब्लिसिटी कन्टेन पोस्टर तथा ट्रेलरमा मिहिनेत गर्ने र चरित्र निर्माणमा ध्यान दिने गरिए पनि चलचित्र अपेक्षित हुने गरेका छैनन् ।

‘अगस्त्य च्याप्टर–१’ मा सौगात मल्लको चरित्रमा मिहिनेत देखिएको थियो । तर, सौगातको चरित्रमा मिहिनेत गरिएजस्तो समग्र सिनेमा थिएन । ‘डिग्री माइला’को ट्रेलरले धेरैलाई लोभ्याए पनि चलचित्रले त्यही अनुपातमा दर्शक हलमा तान्न सकेन । दिनेश राउतकै चलचित्र ‘प्रकाश’मा प्रदीप खड्काले आफूलाई भर्सटाइल अभिनेताका रूपमा प्रमाणित गरे । तर, हाइपअनुसार ठूलो संख्यामा सिनेमा हेर्न दर्शक हलमा पुगेनन् ।

तर, पब्लिसिटी कन्टेन गीत, पोस्टर र ट्रेलरमा खासै आकर्षण नदेखिएको ‘महाजात्रा’ले लोभलाग्दो बक्सअफिस कलेक्सन गर्‍यो । गीतबाहेक पब्लिसिटी कन्टेनमा खासै आकर्षण नदेखिएको र राम्रो हाइप बनाउन नसकेको ‘बोक्सीको घर’ले समेत अनपेक्षित बक्सअफिस कलेक्सन गर्‍यो । त्यसैले ट्रेलर वा पोस्टरभन्दा पनि समग्र चलचित्र कस्तो छ, त्यसले व्यापार निर्धारण गर्ने विगतका सिनेमाले पुष्टि गरेका छन् ।