काठमाडौं । लगातार ४९औँ खेलसम्म अपराजित रहेको बायर लेभरकुजेन यूईएफए युरोपा लिगको फाइनलमा प्रवेश गरेको छ । बिहीबार भएको खेलमा रोमाविरुद्ध २–२ को बराबरी खेले पनि समग्रमा ४–२ को जित निकाल्दै जाभी अलोन्सोको टोली लेभरकुजेन फाइनलमा प्रवेश गरेको हो ।

पहिलो लेगमा आफ्नै घरमा पराजित भए पनि रोमाले जर्मनीमा भने सुधारिएको प्रदर्शन गरेको थियो । पछिल्लो ४९ खेलमा अपराजित रहेको लेभरकुजेनले यो अवधिमा खेलेको यो नवौँ बराबरी हो । ४० खेलमा जितको नतिजा निकालेको लेभरकुजेनले यस सिजनमा जर्मन बुन्डेसलिगाको उपाधि समेत सुनिश्चित गरिसकेको छ ।

लेभरकुजेनले अब युरोपा लिगको उपाधिका निम्ति इटालियन टोली एटलान्टाविरुद्ध खेल्नेछ । यी दुई टिमबीचको फाइनल खेल मे २२ मा हुनेछ ।