काठमाडौं । नेपाली कांग्रेसका नेता अर्जुन नरसिंह केसीले नेपाली कांग्रेसले सरकारको नेतृत्व परिवर्तनका लागिभन्दा पनि मुलुकको अस्थिरता अन्त्यका लागि प्रयास गर्नुपर्ने बताएका छन् ।

नेपाल प्रेस युनियन मोरङले विराटनगरमा आयोजना गरेको पत्रकार सम्मेलनमा उनले निर्वाचन प्रणाली सुधारलगायत विषयमा प्रमुख राजनैतिक दलहरू एक ठाँउमा उभिएर संविधान संशोधन गर्नुपर्ने समेत बताए ।

नेता केसीले  कांग्रेस अस्थिरताको कारक बन्न नहुने धारणा राखे । मुलुकमा देखिएको राजनैतिक अस्थिरता अन्त्यका लागि प्रत्यक्ष निर्वाचित प्रधानमन्त्री आवश्यक भएको उनको भनाइ छ । 

केसीले नेपालको चुच्चे नक्सा नोटमा राख्ने सरकारको निर्र्णय शासन सत्ता सञ्चालनमा देखिएको त्रुटि लुकाउन मात्र ल्याइएको आरोप लगाए । चुच्चे नक्साको विषय कूटनैतिक रूपमा समाधान गर्न उनले सरकारलाई सुझाव दिए ।