काठमाडौं । राइडसेयरिङ एप इन्ड्राइभ नेपालमा कम्पनी दर्ता भएर औपचारिक रूपमा सञ्चालनमा आएको छ । काठमाडौंमा सोमबार एक कार्यक्रमको आयोजना गर्दै कम्पनीले नेपालमा कानुनअनुसार दर्ता भएर सेवा सुरू गरेको जनाएको हो । 

यसअघि, राइडरहरूबाट कमिसन नलिएर सञ्चालनमा रहेको इन्ड्राइभले अब भने कमिसन लिनेछ । कम्पनीले अन्य राइड हेलिङ कम्पनीको तुलनामा कम १० प्रतिशत मात्रै कमिसन लिने बताएको छ । यो शुल्क करसहित भएको र राइडरबाट १० प्रतिशतबाहेक थप रकम नलिने कम्पनीको भनाइ छ ।

राइडरहरूले इन्ड्राइभलाई शुल्क तिर्न एपभित्र रहेको वालेट भन्ने अप्सनमा गएर पैसा लोड गर्नुपर्नेछ । आईएमईपेबाट पैसा लोड गरेपछि प्रत्येक राइडबाट कमाएको रकमको १० प्रतिशत रकम काटिनेछ र लोड गरेको पैसा सकिएपछि फेरि लोड गर्नुपर्नेछ ।

कार्यक्रममा कम्पनीको एसिया–प्यासिफिक कम्युनिकेसन हेड पवित नन्दा आनन्दले चाहेअनुसारको भाडा तय गर्न सकिने हुँदा इन्ड्राइभ अरुभन्दा फरक रहेको बताइन् । इन्ड्राइभको नेपालका लागि निर्देशक रिता पोखरेलले अब चाँडै नै कम्पनीले यात्रुका लागि बिमा समेत ल्याउने जानकारी दिइन् ।

कम्पनीको कार्यालय हात्तिसार काठमाडौंमा रहेको निर्देशक पोखरेलले बताइन् । अब काठमाडौं बाहिरका सहरमा सेवा विस्तार गर्ने लक्ष्य रहेको उनको भनाइ छ । इन्ड्राइभले राइड सेयरिङबाहेक कुरियर, कार्गाेलगायत अन्य सेवा पनि नेपालमा विस्तार गरिरहेको छ ।

ग्राहक एवं प्रयोगकर्ताका समस्या र गुनासोहरू तत्काल सम्बोधन गरिरहेको उनको दाबी छ । कुनै घटना घटेमा समेत एक घण्टाभित्रमा प्रहरीमार्फत् समाधानको प्रयास थालिरहेको नेपालका लागि इन्ड्राइभकी निर्देशक पोखरेलको भनाइ छ ।

इन्ड्राइभका संस्थापक आर्सेन टम्स्की हुन् । रुसको साइबेरिया क्षेत्रमा जन्मेका  टम्स्कीले सन् २०१२ मा रुसकै याकुत्स्क सहरबाट इन्ड्राइभ कम्पनी सुरू गरेका थिए । कम्पनी सन् २०१३ देखि औपचारिक रूपमा सुरू भएको थियो । हाल अमेरिकाको क्यालिफोर्नियामा मुख्यालय रहेको कम्पनीले ४५ देशका ७०० भन्दा बढी देशमा सेवा दिइरहेको छ । 

२० करोडभन्दा बढीपटक डाउनलोड भइसकेको इन्ड्राइभ विश्वकै दोस्रो धेरै डाउनलोड हुने राइड तथा ट्याक्सी सेयरिङ एप हो ।