काठमाडौं । जोन्सन चार्ल्स र आन्द्रे फ्लेचरको अर्धशतकप्रेरित वेस्ट इन्डिज ‘ए’ ले चौथो ट्वान्टी–२० खेलमा नेपालसामु २१० रनको लक्ष्य प्रस्तुत गरेको छ । 

बिहीबार कीर्तिपुरस्थित त्रिवि क्रिकेट मैदानमा टस जितेर ब्याटिङमा आएको वेस्ट इन्डिजले निर्धारित २० ओभरमा तीन विकेट गुमाएर २०९ रन बनाएको हो ।

वेस्ट इन्डिजका फ्लेचरले सर्वाधिक ८४ रन बनाए । उनले ४६ बलमा आठ चौका र ६ छक्का प्रहार गरे । ९–१ को अवस्थामा ब्याटिङका लागि आएका फ्लेचरले दोस्रो विकेटका लागि जोन्सन चार्ल्ससँग ९२ रनको साझेदारी गरेका थिए । 

चार्ल्सले ३० बलमा तीन चौका र ६ छक्कासहित ५८ रन बनाए । फाबियन एलनले १९ बलमा दुई चौका र तीन छक्कासहित ३३ रन थपे ।

नेपालका कुशल भुर्तेलले दुई र प्रतिश जिसीले एक विकेट लिए ।

शृंखला बराबरी गर्न आज नेपाललाई जित्नै पर्ने दबाब छ । नेपालले यसअघि तीनमध्ये दुई खेलमा हार र एक खेलमा जित निकालेको थियो । आजको खेलमा जित निकाले वेस्ट इन्डिज ‘ए’ ले अन्तिम खेल अगावै शृंखलाको उपाधि जित्नेछ ।

यसअघि पहिलो खेलमा नेपाल चार विकेटले विजयी हुँदा दोस्रो खेलमा १० रन र तेस्रो खेलमा ७६ रनले पराजित भएको थियो ।