विराटनगर । विराटनगर महानगरपालिका वडा नम्बर–६ को आयोजनामा टी–१० च्याम्पियनसिप क्रिकेट प्रतियोगिता हुने भएको छ । विराटनगर–६ स्थित म्यारीलिबोन विराटनगर ज्वाला क्रिकेट मैदानमा प्रतियोगिता सञ्चालन हुने आयोजकले आइतबार पत्रकार सम्मेलनमार्फत जानकारी गराएको हो । 

आगामी जेठ १२ देखि २९ गतेसम्म सञ्चालन हुने प्रतियोगितामा नेपालका विभिन्न आठ टिमले सहभागिता जनाउने आयोजकले जनाएको छ । सहभागी टिमको टुंगो भने लागिसकेको छैन ।

प्रतियोगितामा प्रथम हुने टोलीले नगद पाँच लाख पुरस्कार प्राप्त गर्नेछ । दोस्रो हुने टिमले दुई लाख, तेस्रो हुने टिमले एक लाख र चौथो हुने टिमले ५० नगद पुरस्कार प्राप्त गर्ने आयोजकले जानकारी दिएको छ ।

खेल दिवा र रात्रिकालीन समयमा सञ्चालन हुने छ । खेलको प्रत्यक्ष प्रसारणको तयारी समेत गरिएको आयोजकले बताएको छ ।

वडा नम्बर–६ का वडाध्यक्ष हरिश्चन्द्र सहनीले टी–१० च्याम्पियनसिप प्रतियोगिता पहिलोपटक सञ्चालन हुन लागेकाले यसलाई सफल बनाउन सबैले सहयोग गर्नुपर्ने बताए । यस किसिमका प्रतियोगिताले विराटनगरको क्रिकेट क्षेत्र थप फराकिलो बन्दै जाने उनको विश्वास छ ।