काठमाडौं । साविक उपविजेता सशस्त्र प्रहरी बलको एपीएफ क्लबले सातौँ केएनपी नेरोलेकशेरबहादुर खड्का स्मृति राष्ट्रिय महिला भलिबल प्रतियोगिताको उपाधि जितेको छ ।
शनिबार त्रिपुरेश्वरस्थित राष्ट्रिय खेलकुद परिषद्को कभर्ड हलमा भएको फाइनलमा एपीएफले अर्को विभागीय टोली नेपाल पुलिस क्लबलाई २५– २२, २६–२४ र २५–१९ को सोझो सेटमा पराजित गर्यो । एपीएफकी पूजा थारु फाइनलको ‘प्लेयर अफ दी म्याच’ घोषित भइन् ।
सातौँ संस्करणको समाप्तिमा एपीएफ छैटौँपटक च्याम्पियन बन्यो । छैटौँ संस्करणमा मात्र एपीएफ उपविजेतामा सीमित भएको थियो । त्यो संस्करणको फाइनलमा एपीएफ न्यु डायमन्डसँग चुकेको थियो ।
अपराजित रहँदै उपाधि जितेको एपीएफले राउन्ड रोबिन लिगमा पुलिस, नेपाल आर्मी र न्यु डायमन्डलाई हराएको थियो । विजेता एपीएफले चार लाख ९९ हजार र उपविजेता पुलिसले दुई लाख ५० हजार रुपैयाँ पुरस्कार पाए ।
केएनपी नेरोलेकको मुख्य प्रायोजनमा शेरबहादुर खड्का स्मृति प्रतिष्ठानद्वारा आयोजित प्रतियोगितामा डिफेन्डिङ च्याम्पियन न्यु डायमन्डले तेस्रो स्थानमा चित्त बुझायो । तेस्रो स्थानका निम्ति भएको खेलमा न्यु डायमन्डले आर्मीलाई २४–२६, २५–२०, २५–१५ र २५–२० ले पाखा लगायो । राउन्ड रोबिन लिगमा पनि न्यु डायमन्डले आर्मीलाई हराएको थियो । न्यु डायमन्डकी रीमा कुँवर ‘प्लेयर अफ दी म्याच’ बनिन् । न्यु डायमन्डले एक लाख २५ हजार र आर्मीले ६२ हजार ५०० रुपैयाँ नगद पुरस्कार प्राप्त गरे ।
एपीएफकी निरुता ठगुन्ना सर्वोत्कृष्ट खेलाडी घोषित हुँदै ५० हजार रुपैयाँबाट पुरस्कृत भइन् । पुलिसकी लक्ष्मी चन्द उत्कृष्ट स्पाइकर, एपीएफकी कविता भट्ट उत्कृष्ट सर्भर, न्यु डायमन्डकी सुमित्रा रेग्मी उत्कृष्ट ब्लकर, एपीएफकी जसना महतो उत्कृष्ट सेटर, पुलिसकी शान्तिकला तामाङ उत्कृष्ट लिबेरो र एपीएफका महेश चौधरी उत्कृष्ट प्रशिक्षक चुनिए । आ–आफ्नो विधामा उत्कृष्ट हुनेले जनही २५ हजार रुपैयाँ पुरस्कार जिते । हरेक खेलको ‘प्लेयर अफ दी म्याच’लाई १५ हजार रुपैयाँका दरले पुरस्कार प्रदान गरिएको आयोजकले जानकारी गराएको छ ।
प्रतियोगितामा चार टिम सहभागी थिए ।
