वासिङटन । अमेरिकाले यसअघि नै युक्रेनलाई आधुनिक हतियार पठाइसकेको खुलासा भएको छ । अमेरिकी अधिकारीका अनुसार मध्यम दूरीमा प्रहार गर्ने हतियार पठाइएको हो । ती हतियार यसै महिना युक्रेन पुगिसकेका छन् । दुई स्थानमा तिनको प्रयोग समेत भइसकेको छ । क्राइमिया र बर्डयान्स्क क्षेत्रमा ती हतियार पहिला नै प्रयोग भइसकेका छन् । बलिस्टिक मिसाइल रहेको समाचारमा उल्लेख छ । 

उक्त सहयोग यसअघि अमेरिकाले गएको मार्चमा पास गरेको ३०० मिलियन डलरको सहयोग प्याकेजअन्तर्गत भएको जनाइएको छ । पहिला पठाएका मध्यम दूरीका हतियार भएकोमा अब अमेरिकाले लामो दूरीका रणनीतिक हतियार पठाउन चाहेको बताइएको छ । अमेरिकी विदेश मन्त्रालयका प्रवक्ता वेदान्त पटेलका अनुसार राष्ट्रपति वाइडेनको प्रत्यक्ष निर्देशनमा नै ती सामग्री पठाइएका हुन् । 

युक्रेनले अपरेसनल सुरक्षाको कारण देखाउँदै पहिला पठाइएका हतियारबारे सार्वजनिक नगरिदिन आग्रह गरेअनुसार अमेरिकाले त्यसबारेमा यसअघि गोपनीयता कायम गर्दै आएको बताइएको छ । लामो दूरीको मिसाइलले ३०० किलोमिटर दूरीसम्म प्रहार गर्नसक्ने जनाइएको छ ।

अमेरिकी राष्ट्रपति जो वाइडेनले अमेरिकाले नयाँ हतियार र उपकरण तत्कालै पठाउने बुधबार बताएका थिए । सोही दिन वैदेसिक सहायता सम्बन्धी संसद्का दुवै सदनबाट पारित विधेयकमा हस्ताक्षर गरेपछि रुसको सामना गर्न अमेरिकाले किभिमा हतियार र उपकरण पठाउने बताएका हुन् ।

वाइडेनले बुधबार ९५ बिलियन अमेरिकी डलर बराबरको वैदेशिक सहयोग सम्बन्धी विधेयकमा हस्ताक्षर गरेका थिए । उनको हस्ताक्षरपछि उक्त विधेयक कानुन बनेको छ । “यसले अमेरिकालाई अझ सुरक्षित बनाउनेछ । यसले विश्वलाई नै सुरक्षित बनाउनेछ,” हस्ताक्षरलगत्तै उनले भनेका थिए  ।

सहायता प्याकेजमा युक्रेनसँगै इजरायल, ताइवान र इन्डो–प्यासिफिक सम्बन्धी प्याकेज समेत त्यसमा रहेको छ । बीबीसी