इलाम । राष्ट्रिय स्वतन्त्र पार्टी (रास्वपा)का सभापति रवि लामिछानेले आफू नेतृत्वको पार्टी खास जाति, वर्ग र समुदायको पहिचानको पक्षमा नरहेको स्पष्ट पारेका छन् ।
बुधबार इलाममा आयोजित चुनावी सभालाई सम्बोधन गर्दै सभापति लामिछानेले रास्वपाले जाति, धर्म र समुदायको नाममा राजनीति नगर्ने भन्दै आफूहरू बहुपहिचानको पक्षमा रहेको बताए ।
“बरु चुनाव हारौंला, तर गलत प्रवृत्तिलाई प्रोत्साहित गर्ने राजनीति गर्दैनौँ । बहुभाषिक, बहुधार्मिक र बहुसांस्कृतिक मुलुकमा एकल पहिचानले हित गर्दैन,” उनले भने । रास्वपाले सबैभन्दा बढी पहिचानको मुद्दालाई व्यवहारमा उतारेको उनको भनाइ छ ।
उपप्रधान तथा गृहमन्त्रीसमेत रहेका लामिछानेले आचारसंहिता अक्षरंश पालना गराउन सुरक्षा निकायलाई निर्देशन दिँदै मौन अवधिमा आर्थिक चलखेल नगर्न दल र उमेदवारलाई चेतावनी पनि दिए ।
यही वैशाख १५ मा हुने उपनिर्वाचनका लागि बुधबार मध्यरातिबाट मौन अवधि सुरु हुँदै छ । “मौन अवधि भनेको मनी (पैसा) अवधि भएको कुरा तपाईंहरूले सुन्नुभएको छ होला,” गृहमन्त्री लामिछानेले भने, “खबरदार, इलाम र बझाङमा मौन अवधिलाई मनी अवधिको रूपमा प्रयोग नगरियोस् ।” आचारसंहिता उल्लंघन गर्नेलाई कानुनको दायरामा ल्याएरै छोड्ने उनको भनाइ छ ।
