काठमाडौं । विद्युतीय गाडी निर्माता टेस्लाले अर्काे वर्षको अन्त्यसम्म मानिसले जसरी काम गर्नसक्ने ह्युमेनोइड रोबोट ‘अप्टिमस’ बिक्री गर्नसक्ने बताएको छ । टेस्लाका मालिक एलन मस्कले मंगलबार कन्फरेन्स कलमा लगानीकर्ताहरूसँग यस्तो भनेका हुन् ।

उनका अनुसार अप्टिमस रोबोट यस वर्षको अन्त्यसम्म कारखानामा काम गर्न सक्ष्मम हुनेछ । धेरै कम्पनीले श्रमिकको अभाव पूर्ति गर्न र एउटै किसिमले दोहोरिरहने काम गर्नका लागि ह्युमनोइड रोबोटको विकासमा काम गरिरहेका छन् ।

जापानको होन्डा र हुन्डाइ मोटरको बोस्टन डाइनामिस्कले लामो समयदेखि यस्ता रोबोट बनाउँदै आएको छ ।

यसै वर्ष माइक्रोसफ्ट र एनभिडियाको समर्थन रहेको स्टार्टअप फिगरले जर्मन अटो निर्माता बीएमडब्ल्यूसँग मानिसले जस्तै गतिविधि गर्नसक्ने रोबोट बनाउनेसम्बन्धी सम्झौता गरेका छन् ।मस्कले ह्युमेनोइड रोबोट बनाउन टेस्ला अरुभन्दा राम्रो स्थानमा रहेको भनेका छन् ।

केही अघि टेस्लालेले यसको दोस्रो पुस्ताको एक रोबोटले कारखानामा कपडा पट्याइरहेको भिडियो सार्वजनिक गरेको थियो । सन् २०१९ मा मस्कले लगानीकर्ताहरूलाई सन् २०२० सम्ममा रोबोट्याक्सी नेटवर्क सञ्चालनमा ल्याउने भने पनि सफल भने भएको छैन ।