काठमाडौं । पूर्वराष्ट्रपति विद्यादेवी भण्डारीले कम्युनिस्ट आन्दोलनमा देखिने विभाजन राजनीतिक कारणले भएको हो कि पदीय आकांक्षाले भन्ने समीक्षा गर्नुपर्ने बताएकी छन् । नेकपा स्थापना दिवसको अवसरमा ललितपुरको गोदावरीमा सोमबार आयोजित कार्यक्रममा एमालेले उनलाई ‘गणतन्त्र गौरव सम्मान’ प्रदान गरेको थियो ।
सोही सम्मानपछि सम्बोधनका क्रममा उनले फुटको समीक्षा नगरे भविष्यमा थप सफलता हासिल गर्न कठिनाइ हुने बताइन् । “नेपाली कम्युनिस्ट आन्दोलनले आफ्नो हीरक जयन्ती मनाइरहँदा यस आन्दोलनको गहन समीक्षा गरिनुपर्छ भन्ने मलाई लागेको छ । सँगै स्थापना भएका अरु देशका कम्युनिस्ट पार्टी किन के कति सफलता हासिल गरे र के कस्ता विफलता व्यहोर्नुपर्यो । नेपाली कम्युनिस्ट आन्दोलनमा पटक–पटक देखिने गरेको फुट र विभाजन साँच्चै सिद्धान्त, विचार र राजनीतिक कारणले भएको हो कि पदीय आकांक्षा, अवसरवाद र भड्काव हाबी हुँदा भएको हो ? भन्ने जस्ता विषयमा समीक्षा गरी ठोस निष्कर्ष निकाल्न सकिएन भने भविष्यमा थप सफलता हासिल गर्न कठिनाइ हुन्छ,” भण्डारीले भनिन् ।
लोकतान्त्रिक गणतन्त्रलाई सुदृढ तुल्याउन लागेका सबै राजनीतिक दलले आफ्नो पार्टीले लिएको नीति तथा आदर्शमा विचलन आएको छ कि छैन भन्ने बेला–बेलामा समीक्षा गर्दै अघि बढ्नुपर्ने उनको भनाइ छ । एमालेका तत्कालीन महासचिव मदन भण्डारीलाई सम्झने क्रममा उनी भावुक बनिन् । “एमालेका तत्कालीन महासचिव जननेता मदन भण्डारीको ०५० जेठ ३ गते रहस्यमय जीप दुर्घटनामा निधन भएपछि मेरो राजनीतिक यात्राले नयाँ मोड लिएको थियो,” उनले भावुक हुँदै भनिन् ।
एमालेको प्रेरणा, प्रोत्साहन र जनताका चाहनाअनुसार थप जिम्मेवारीका साथ राजनीतिमा सक्रिय हुने परिवेश निर्माण हुन पुगेको स्मरण गरिन् ।
