विराटनगर । नेकपा माओवादी केन्द्र कोसी संसदीय दलका नेता इन्द्र आङ्बोले कोसी सरकार अल्पमतमा परेको दाबी गरेका छन् । 

शुक्रबार कोसी प्रदेशसभाको बैठकमा सदनमा दर्ता भएको संकल्प प्रस्तावमाथिको छलफलमा उनले सरकार अल्पमतमा परेकाले मुख्यमन्त्री केदार कार्कीले मार्ग प्रशस्त गर्नुपर्ने वा विश्वासको मत लिनुपर्ने बताए । 

प्रदेशसभाको अधिवेशन बोलाउने विषयमा पनि सरकारको नियतप्रति शंका गर्दै उनले भने, “प्रदेशसभाको अधिवेशन बोलाउने विषयमा सरकारको नियत राम्रो छैन ।” सरकारले आगामी जेठ ११ गते संसद अधिवेशन बोलाउने निर्णय गरेको छ । 

सरकार बहुमतले नै चलाउने भन्दै आङ्बोले समर्थन वा विश्वासको मत दल वा व्यक्तिले फिर्ता लिन सक्ने बताए । ३० दिनसम्म विश्वासको मत लिन समय दिइएको र सरकार संसद्‌बाटै बन्ने बताउँदै उनले भने, “पारित संकल्प प्रस्ताव कानुनसरह हुन्छ । बहुमतले अल्पमतलाई शासन गर्ने हो । कांग्रेसको लोकतान्त्रिक मूल्य मान्यताको परीक्षणको बेला छ ।” 

कोसी प्रदेशसभामा नेकपा एमाले र माओवादी केन्द्रले वैसाख ३ गते संकल्प प्रस्ताव दर्ता गराएका थिए ।