काठमाडौं । मधेस प्रदेशका मुख्यमन्त्री सरोजकुमार यादवले मन्त्रिपरिषद्  विस्तार गरेका छन् । 

चौथो पटक विश्वासको मत लिएको एक दिन नबित्दै मुख्यमन्त्री यादवले तीन मन्त्री र एक राज्यमन्त्रीलाई मन्त्रिपरिषद्मा सामेल गरेका हुन् । नवनियुक्त मन्त्रीहरूमा भरतप्रसाद साह बिनाविभागीय, युवराज भट्टराई उद्योग वाणिज्य तथा पर्यटन, बेची लुंगेलीले बिनाविभागीय मन्त्रीको जिम्मेवारी पाएका छन् । 

शारदा थापालाई गृह, सञ्चार तथा कानुन मन्त्रालयको राज्यमन्त्रीको जिम्मेवारी दिइएको छ । साह र भट्टराई नेकपा (माओवादी केन्द्र)बाट सरकारमा सहभागी भएका छन् । लुंगेली नेकपा (एकीकृत समाजवादी) र थापा एमालेबाट सरकारमा सहभागी भएका हुन् । नवनियुक्त मन्त्रीहरूलाई प्रदेश प्रमुख सुमित्रा सुवेदी भण्डारीले पद तथा गोपनीयताको शपथग्रहण समेत गराएकी छन् ।

यता माओवादीबाट उद्योग वाणिज्य तथा पर्यटन मन्त्रालयको जिम्मेवारी सम्हाल्दै आएकी सुनिता यादवलाई फिर्ता बोलाइएको छ । माओवादीका भरत साहले भने अर्थ मन्त्रालयमा दाबी गर्दै आए पनि टुंगो नलागेका कारण बिनाविभागीय मन्त्रीको शपथ लिएका हुन् ।