काठमाडौं । अन्तरिक्षबाट खसेको फोहोरको टुक्राले अमेरिकाको फ्लोरिडामा एक घरको छत हुँदै दुई तला छेडेको छ । उक्त वस्तु अन्तराष्ट्रिय अन्तरिक्ष केन्द्र (आईएसएस)बाट गत महिना खसेको पुष्टि भएको छ ।

अमेरिकी अन्तरिक्ष एजेन्सी नासाले उक्त वस्तु आईएसएसको हिस्सा भएको पुष्टि गरेको हो । नासाले उक्त वस्तु करिब २ हजार ६३० किलोग्राम तौल भएको हार्डवेयरको टुक्रा भएको बताएको छ ।

आईएसएसमा नयाँ लिथियम–आयन ब्याट्री जडान गरेपछि सन् २०२१ को मार्चमा उक्त वस्तु फालिएको थियो । त्यो हार्डवयर गत मार्च ८ मा पृथ्वीको वायुमण्डलमा प्रवेश गर्नेबेला पूर्णरुपमा जलेर नष्ट होला भन्ने अपेक्षा थियो । तर त्यसको एक टुक्रा वायुमण्डलबाट समेत जोगिएर खसेपछि फ्लोरिडाको नेपल्स स्थित एक घरमा क्षति गरेको हो ।

घरधनी अलेजान्ड्रो ओटेरोले परिवारका सदस्य कसैलाई पनि केही नभएको बताएका छन् । उनले नै नासालाई खबर गरेका थिए । 

करिब ७०० ग्रामको उक्त वस्तु मिश्रत धातु इन्कोनेलबाट बनेको बताइएको छ । यसले उच्च तापक्रम, चाप, वा मेकानिकल लोडजस्ता चरम अवस्थाको सामना गर्नसक्छ ।

पछिल्ला वर्षहरूमा हजारौँको संख्यामा अन्तरिक्षयानहरू प्रक्षेपण भइरहेका छन् । त्यसबाट अन्तरिक्षमा सिर्जित प्रदूषणले त्यहाँ मात्रै नभएर पृथ्वीसम्म क्षति गर्नसक्ने यो घटनाले पुष्टि गरेको छ । बीबीसी