सिड्नी ।अष्टेलिया प्रहरीले सोमबार सिडनीको चर्चमा भएको चक्कू आक्रमणलाई धर्मको आधारमा प्रेरित आतंकवादी घटना भएको जनाएको छ ।
एसिरियन क्राइस्ट द गुड शेफर्ड चर्चमा प्रार्थनाको क्रममा एक विशप, एक पादरी र अन्य भक्तजनमाथि चक्कू आक्रमण गरिएको थियो । घटनामा संलग्न रहेको आरोपमा प्रहरीले एक १६ वर्षिय युवालाई गिरफ्तार गरेको छ ।
प्रहरीका अनुसार सो घटनामा कम्तिमा चार जनालाई चोट लागेको छ । उक्त आक्रमणमा आक्रमणकारी पनि घाइते भएको छ । सिड्नीको उपनगर वाकेलीको सो चर्चमा प्रार्थनाको लाइभ स्टिम गरिएको थियो ।
सोही क्रममा सो हमला पनि प्रसारित भएको थियो ।घटना लगत्तै सैयौं मानिस चर्चको बाहिर जम्मा भएका थिए । उनीहरुको प्रहरीसँग समेत झडप भएको थियो । यस क्रममा प्रहरी अधिकारी घायल हुनुका साथै प्रहरीका २० गाडीमा पनि क्षति भएको थियो ।
घाइतेको उपचारका लागि गएका स्वास्थ्यकर्मीलाई समेत मानिसहरुले करिब ३ घण्टा बन्धक बनाएर राखेका थिए । प्रधानमन्त्री एन्थनी एलबनीजले राष्टिय सुरक्षा परिषदको बैठक डाकेर हमलालाई चिन्ताजनक बताए ।
उनले आफ्नो देश शान्तिप्रिय भएको र त्यहाँ हिंसा र उग्रपन्थलाई कुनै स्थान नभएको बताए । एक हप्ताको बीचमा अष्टेलियामा चक्कु प्रहारको घटना भएको यो दोस्रो पटक हो । हालै सिडनीको एक शहरमा भीड रहेको मलमा चक्कू प्रहार हुँदा ६ जनाको मृत्यु भएको थियो । बीबीसी