काठमाडौं । सत्तारूढ प्रमुख घटक नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले संवैधानिक दायरामा आएर राजनीतिक गतिविधिलाई अघि बढाउन राष्ट्रिय प्रजातन्त्र पार्टी (राप्रपा)लाई चेतावनी दिएका छन् ।
गणतन्त्रमा नागरिकका अधिकार सुरक्षित रहने भएकाले संवैधानिक बाटोबाटै समस्याको समाधान गर्न सकिने उनले उल्लेख गरे । सोहीअनुसारको गतिविधि अघि बढाउन उनले राप्रपालाई सचेत गराए ।
शनिबार काठमाडौंमा आयोजित एक कार्यक्रममा अध्यक्ष ओलीले संविधान, परिवर्तन नै नमान्ने, जनताको सर्वोच्चता नमान्ने र एउटा ‘मालिक’ चाहियो भनेर कुद्ने गतिविधि सह्य नहुने बताए । उनले गणतन्त्रमा नागरिक सर्वोच्चता हुने भएकाले कुनै मालिकलाई स्थापना गरेर राज्य अघि बढ्न नसक्नेमा जोड दिए ।
“...अहिले पनि केही मान्छेहरूमा उत्ताउलापनहरू देखिन्छन् । म ती राजनीतिक शक्ति र व्यक्तिहरू छन्, त्यस्ता राजनीतिक समूह वा व्यक्तिहरूलाई आग्रह पनि गर्न चाहन्छु, सुझाव पनि दिन चाहन्छु–संविधानको दायरा भित्र आउनुस्,” उनले भने ।
कुनै पनि माग सम्बोधन गर्न नेपालको संविधानले प्रतिबन्ध नलगाएको भन्दै उनले राप्रपालाई सचेत गराए । “...अहिले संवैधानिक बाटोबाट कुनै पनि माग पूरा गर्न कतै प्रतिबन्ध छैन । निरंकुशताका समयमा राजतन्त्र भएका बेलामा त्यसले प्रतिगमन गर्थ्यो,” उनले भने, “अहिले जनताका अधिकार खोसिँदैन । खोस्न मिल्दैन । यो राजतन्त्र भएको समय होइन, खोस्न मिल्दैन । यो गणतन्त्र हो ।”
अध्यक्ष ओलीले मुलुकमा केही पनि भएको छैन भन्ने खालको निराशा पालेर नबस्न पनि युवालाई आग्रह गरे । न्युज एजेन्सी नेपाल
