काठमाडौं । चालु आर्थिक वर्ष २०८०/८१ को आठ महिनामा वाणिज्य बैंकहरूले ४८ अर्ब ३० करोड ६९ लाख रुपैयाँ नाफा कमाएका छन् । नेपाल राष्ट्र बैंकका अनुसार गत वर्ष २०७९/८०को फागुन मसान्तसम्मको तुलनामा चालु अर्थिक वर्षको सोही अवधिमा वाणिज्य बैंकहरूको नाफा घटेको हो ।

गत वर्षको फागुनसम्म २१ वाणिज्य बैंकले ४८ अर्ब ८३ करोड १० लाख रुपैयाँ नाफा आर्जन गरेका थिए । यो वर्ष नाफा घट्नुमा अर्थतन्त्रमा आएको मन्दीका सार्थ खराब कर्जा बढ्नुलाई लिइएको छ । यसको असर आगामी दिनमा पनि पर्ने बैंकरहरू बताउँछन् ।

त्यस्तै, अहिले २० वटा वाणिज्य बैंक सञ्चालनमा छन् । सन्‌राइज बैंक लक्ष्मीसँग समाहित हुँदा पनि त्यसको असर अहिलेको नाफामा देखिएको छ । लक्ष्मी र सन्‌राइज बैंक मर्जरमा गएपछि अहिले लक्ष्मी सन्‌राइज बैंकको नामबाट एकीकृत कारोबार भइरहेको छ ।

गत फागुन मसान्तसम्म लक्ष्मी बैंकले एक अर्ब ३६ करोड ४६ लाख रुपैयाँ नाफा आर्जन गरेको थियो । त्यस्तै, सन्‌राइज बैंकले एक अर्ब आठ करोड रुपैयाँ नाफा आर्जन गरेको थियो ।

यो वर्ष मर्जरमा गएपछि यी दुई बैंक मिलेर बनेको लक्ष्मी सन्‌राइज बैंकले एक अर्ब ८२ करोड रुपैयाँ नाफा आर्जन गरेको छ । 

यो बैंकको मात्र हैन चालु आर्थिक वर्षमा प्राय बैंकको नाफामा प्रभाव परेको छ । गत वर्षको तुलनामा गर्दा यो वर्ष अधिकांश बैंकको नाफा घटेको छ । तर, पाँच वाणिज्य बैंकको नाफामा भने वृद्धि भएको छ ।

यो वर्षको फागुन मसान्तसम्म नाफा वृद्धि गर्नेमा कृषि विकास, प्राइम कमर्सियल, हिमालयन, सिद्धार्थ र एभरेष्ट बैंक छन् । यीमध्ये कृषि विकास बैंकले एक अर्ब ५६ करोड ५० लाख रुपैयाँले नाफा वृद्धि गरेको छ ।

फागुनसम्मको नाफा/घाटाको अवस्था रु. १० लाखमा

फागुन मसान्तसम्म सर्वाधिक नाफा घट्नेमा एनआईसी एसिया बैंक छ । यो बैंकको गत वर्षको फागुनसम्मको तुलनामा ६ अर्ब ५२ करोड रुपैयाँले नाफामा कमी आएको छ । फागुनसम्म एनआईसी एसियाले दुई अर्ब ५४ करोड २४ लाख रुपैयाँ नाफा आर्जन गरेको छ । गत वर्षको फागुनसम्म यो बैंकले चार अर्ब पाँच करोड रुपैयाँभन्दा बढी नाफा आर्जन गरेको थियो । 

त्यस्तै, ग्लोबल आईएमई बैंकको नाफा पनि एक अर्ब ५१ करोड रुपैयाँले घटेको छ । फागुनसम्म ग्लोबल आईएमई बैंकले तीन अर्ब ४३ करोड ३० लाख रुपैयाँ नाफा आर्जन गरको छ । गत वर्षको फागुनसम्म यो बैंकले चार अर्ब ३७ करोड २३ लाख रुपैयाँ नाफा आर्जन गरको थियो ।

गत वर्षको फागुनको तुलनामा नाफा घटेको भए पनि सर्वाधिक नाफा गर्नेमा नबिल पहिलो नम्बरमा छ । दोस्रोमा भने ग्लोबल आईएमई बैंक छ । नबिलले फागुन मसान्तसम्म चार अर्ब ७२ करोड ४२ लाख रुपैयाँ नाफा आर्जन गरेको छ । तर, गत वर्षको तुलनामा नाफा ६० करोड १९ लाख रुपैयाँले घटेको छ ।