काठमाडौं । नेपाली कांग्रेसले सहकारी पीडितको मुद्दा संगठित रूपमा उठाउने भएको छ । नेपाली कांग्रेसको संसदीय दलको बैठकमा सभापति शेरबहादुर देउवाले सहकारीको मुद्दामा पछि हट्नुपर्ने कारण नभएको बताएका छन् । 

सभापतिको भनाइसँगै नेपाली कांग्रेस थप सक्रिय रूपमा सहकारी पीडितका पक्षमा उभिने निश्चित भएको संसदीय दलको बैठकमा सहभागी एक नेताले जानकारी दिए । “यति धेरै जनता सहकारीबाट ठगिएका छन्, पर्याप्त कानुन पनि छ,” देउवाको भनाइ उद्धृत गर्दै ती नेताले बाह्रखरीसँग भने, “लाखौँ जनता ठगिएका छन् । यो मुद्दा यसै छोड्नु हुँदैन ।” 

उनले यस्तो मुद्दा छोडेमा पार्टीलाई जनताले साथ छोड्ने बताएका थिए । सभापति देउवाले रास्वपाका सभापति तथा गृहमन्त्री रवि लामिछानेका विषयमा पनि कांग्रेसले उठाएका विषय अझ सशक्त बनाउनुपर्ने बताएका छन् । “लामिछानेविरूद्ध आएका प्रमाणहरू छानबिनका लागि पर्याप्त छन्,” देउवाको भनाइबारे ती नेताले भने, “लाखौँ ठगिएका छन् । उनीहरूलाई न्याय दिनुपर्छ, हामी यसमा लाग्नुपर्छ ।”