काठमाडौं । इन्डियन प्रिमियर लिग (आईपीएल) मा पहिलो जित निकाल्ने क्रममा मुम्बई इन्डियन्सले दिल्ली क्यापिटल्सलाई २९ रनले हराएको छ ।

आइतबार वान्खडे मैदानमा सम्पन्न खेलमा घरेलु टिम मुम्बईले प्रस्तुत गरेको २३५ रनको लक्ष्य पछ्याउने क्रममा दिल्लीले निर्धारित २० ओभरमा आठ विकेट गुमाएर २०५ रनमात्र बनाउन सक्यो ।

दिल्लीका ट्रिस्टान स्टुब्सले ७१ रन बनाए पनि टिमको हार टार्न सकेनन् । ओपनर पृथ्वी साले ६६ रन थपे । अभिषेक पोरेलले ४१ र डेविड वार्नरले १० रन जोडे ।

मुम्बईका गेरार्ल्ड कोएट्जीले चार विकेट लिए । जसप्रित बुमराहले दुई र रोमारियो सेफर्डले एक विकेट हात पारे ।

त्यसअघि टस हारेर ब्याटिङमा आएको मुम्बईले निर्धारित २० ओभरमा पाँच विकेट गुमाएर २३४ रनको योगफल खडा गरेको थियो ।

मुम्बईका ओपनर रोहित शर्माले ४९ रन बनाएका थिए । इशान किसनले ४२ रन थपे । यी दुईले सात ओभरमा ८० रनको साझेदारी गर्दै मुम्बईलाई उत्कृष्ट सुरुआत दिलाएका थिए । टिम डेविडले अविजित ४५ रन जोडे । यस्तै, कप्तान हार्दिक पन्ड्या र रोमारियो सेफर्डले समान ३९ रन बनाए ।

दिल्लीका अक्षर पटेल र एनरिक नोट्जेले समान दुई विकेट लिए । खालिल अहमेदको नाममा एक विकेट रह्यो ।

जितसँगै चार खेलबाट दुई अंक जोडेको मुम्बई तालिकाको आठौँ स्थानमा उक्लिएको छ । पाँच खेलबाट दुई अंक जोडेको दिल्ली तालिकाको पुछारमा छ ।