काठमाडौं । शिक्षासेवी गुणदेव भट्टराईको शतवार्षिकीका अवसरमा ‘श्रद्धेय गुणदेव भट्टराई स्मृतिपुष्प’ एक समारोहका बीच लोकार्पण गरिएको छ । डा. तीर्थबहादुर श्रेष्ठले उक्त स्मृति ग्रन्थ लोकार्पण गरे ।

शनिबार बिहान ललितपुरमा आयोजित कार्यक्रममा गुणदेव भट्टराईका विद्यार्थी श्रेष्ठले आफ्ना गुरुको पढाउने शैलीको स्मरण गर्दै केही प्रसंगहरूको चर्चा गरे । भट्टराईका अर्का विद्यार्थी प्रा.डा. राजेश गौतमले पनि आफ्ना शिक्षक भट्टराईको सम्झना गर्दै उनी हरेक विषयका ज्ञाता भएको बताए ।

कार्यक्रममा कृतिका सम्पादक जयदेव भट्टराईले स्मृतिपुष्पको सम्पादनबारे आफ्ना धारणा राखे । उक्त अवसरमा साहित्यकार लक्ष्मण गाम्नागेले ‘मेरा बा’ शीर्षकको कविता वाचन गरेका थिए ।

लोकार्पित स्मृति ग्रन्थमा भट्टराई परिवारका अतिरिक्त गुणदेव भट्टराईबाट शिक्षा पाएका विभिन्न व्यक्तित्वहरूका आलेख समावेश गरिएको छ ।