काठमाडौं । अग्रज साहित्यिक पत्रकार तथा अभिव्यक्ति द्वैमासिकका संस्थापक सम्पादक नगेन्द्रराज शर्माको नाममा स्थापित ‘नगेन्द्रराज शर्मा साहित्यिक पत्रकारिता पुरस्कार २०८०’ अग्रज साहित्यिक पत्रकार चूडामणि रेग्मीलाई समर्पण गरिएको छ । पुरस्कारका साथ नगद राशि २५ हजार रुपैयाँ प्रदान गरियो ।

शर्माको ८७औँ जन्मदिनको अवसर पारेर उक्त कार्यक्रमको आयोजना गरिएको हो ।

बिहीबार काठमाडौंमा नराश साहित्यिक पत्रकारिता पुरस्कार कोषद्वारा आयोजित कार्यक्रममा प्रमुख अतिथि नगेन्द्रराज शर्माले ८७ वर्षीय रेग्मीलाई पुरस्कृत गर्दै रेग्मीले पुरस्कार स्वीकार गरेर संस्थाको गरिमा बढाएको उल्लेख गरे ।

पुरस्कृत व्यक्तित्व रेग्मीले आफूले झापाबाट ‘जुही’ साहित्यिक पत्रिका प्रकाशन गर्दाको क्षण सम्झँदै साहित्यिक पत्रकारिताको उत्थानका लागि अन्धाधुन्ध खटेको स्मरण गरे ।

झापा कर्मथलो भएका रेग्मीले २०३८ सालदेखि ७० सालसम्म ‘जुही’को प्रकाशन गरेको साहित्यकार विधान आचार्यले बताए ।

कार्यक्रममा पहिलोपटक पुरस्कृत साहित्यिक पत्रकार रोचक घिमिरे, गंगा सुवेदी, श्रीओम रोदन, पवन आलोकले बोलेका थिए ।

कोषले यसअघि ‘रचना’का सम्पादक रोचक घिमिरे र ‘दायित्व’का सम्पादक रामप्रसाद पन्तलाई पुरस्कृत गरिसकेको छ ।