काठमाडौं । प्रदर्शनको संघारमा रहेको चलचित्र ‘द रेड सुटकेस’को डिजिटल राइट्स एचबीओले किनेको छ । चलचित्रको अन्तर्राष्ट्रिय वितरक रिजन एट फिल्मका अनुसार युरोपका १५ देशका लागि एचबीओले फिल्मको ओटीटी अधिकार खरिद गरेको हो । 

निर्देशक फिडेल देबकोटाका अनुसार मलेसिया र ब्रुनाईमा पनि प्रदर्शन अधिकार बिक्री भइसकेको छ । यी दुई देशमा भने फिल्मको हल प्रदर्शन अधिकार बिक्री भएको हो । मलेसिया र बु्रनाईको अधिकार भने सुरया फिल्मले किनेको हो । 

एचबीओले ओटीटी अधिकार लिएसँगै चलचित्रको लगानी सुरक्षित भएको निर्माता रामकृष्ण पोखरेलले जानकारी दिए । 

निर्माता पोखरेलले एचबीओले ओटीटी खरिद गर्नुले घरेलु बजारको दबाबमा नपरी पनि लगानी उठाउन सकिन्छ भन्ने आत्मविश्वास दिएको बताए । इन्डिपेन्डेन्ट सिनेमाका लागि यो आवश्यक रहेको उनको भनाइ छ । 

निर्देशक फिडेल देवकोटाले चलचित्र निर्माण गर्दा नै आफूहरू परम्परागत बजारको पक्षमा नरहेको र सोही अनुसार नै फिल्मको वितरण योजना बनेको बताए । “द रेड सुटकेस मात्र होइन, भविष्यमा यसरी बन्ने अन्य नेपाली फिल्मलाई पनि फाइदा पुग्छ,” उनले भने, “निर्देशकले इमान्दार  र गम्भीर भएर कथा भन्यो भने बजार आफैँ निर्माण गर्न सकिन्छ भन्ने कुराको रूपमा पनि यसलाई लिन सकिन्छ ।” 

यस्ता चलचित्रले घरेलु दर्शक र प्रदर्शकबाट साथ पाए यो नेपाली चलचित्र क्षेत्रकै लागि पनि कोसेढुंगा सावित हुने उनको भनाइ छ । 

भेनिसमा वर्ल्ड प्रिमियर भएर दर्शक र समीक्षकबाट तारिफ पाएको यो चलचित्र यही चैत ३० गतेदेखि नेपालमा रिलिज हुँदै छ । फिल्मका लेखकसमेत रहेका निर्देशक देवकोटा बाहिरको उपलब्धि आफ्नो ठाउँमा रहे पनि आफू घरेलु दर्शकको प्रतिक्रियाका लागि पनि उत्सुक रहेको बताएका निर्माणपक्षले प्रेस नोटमार्फत् जनाएको छ ।  

चलचित्रमा सौगात मल्ल, प्रवीण खतिवडा, सृष्टि श्रेष्ठ र विपीन कार्कीको अभिनय रहेको छ । आइसफल प्रडक्सनका लागि शोभा थापाको निर्माण रहेको फिल्ममा सुशन प्रजापतिको छायांकन छ ।