विराटनगर । सडनडेथमा जित निकाल्दै घरेलु टिम सांग्रिला मोरङ एफए आठौँ संस्करणको विराट गोल्डकपको फाइनलमा प्रवेश गरेको छ । 

विराटनगरस्थित सहिद रंगशालामा बुधबार राति सम्पन्न भएको पहिलो सेमिफाइनल खेलमा विभागीय टिम सशस्त्र प्रहरी बलको एपीएफलाई सडनडेथमा ४–३ गोलले पन्छाउँदै सांग्रिला फाइनलमा पुगेको हो । 

निर्धारित ९० मिनेट र थप गरिएको ३० मिनेटको अतिरिक्त समयमा पनि दुवै टिमबाट नभएपछि जितको छिनोफानो सडेनडेथबाट भएको हो । रोमाञ्चक तथा प्रतिस्पर्धात्मक टाइबे्रकरमा दुवै टोलीले ३–३ गोल गरेका थिए । त्यसपछि खेल सडनडेथमा पुग्यो ।

सडनडेथमा आशिष चापागाईं, अविशेक लिम्बू, उमेश कार्की र किरन राईले गोल गरे । सांग्रिलाका विदेशी खेलाडी एनकेट र सागर तिरुवाको प्रहार  एपीएफका गोलकिपर एन्जल श्रेष्ठ उत्कृष्ट बचाए ।

एपीएफको तर्फबाट दिपेश धिमाल, कुलदिप कार्कीको प्रहार सांग्रिलाका गोलकिपर विशाल सुनारले सानदार बचाउ गरिदिए । एपीएफको तर्फबाट अनिस महर्जन, सुमन श्रेष्ठ र विश्वास उदासले मात्र गोल गरेका थिए । 

सांग्रिलाले उपाधिका लागि बिहीबार हुने दोस्रो सेमिफाइनल खेलमा मच्छिन्द्र र पाहुना टोली सिक्किम ड्रागन भारतबीच हुने खेलको विजेता टिमसँग खेल्नेछ । 

एपीएफले इटहरी गोल्डकप च्याम्प्यिन चर्च ब्वाईज  युनाइटेड काठमाडौंलाई २–० गोलले हराउँदै सेमिफाइनलमा पुगेको थियो । घरेलु टिम सांग्रिलाले भुटानको आरटीसीएफसी ३–२ गोलले हराउँदै सेमिफाइनलको स्थान पक्का गरेको थियो । 

जितमा सांग्रीलाका गोलकिपर विशाल सुनारले प्रभावकारी भूमिका निभाए । उनी खेलको प्लेयर अफ द म्याच घोषित भए । उनले नगद ११ हजार रुपैयाँ पुरस्कार पाए ।