काठमाडौं । हाम्रो कृषि सहकारी अनियमितता प्रकरणमा राष्ट्रिय स्वतन्त्र पार्टी (रास्वपा)का उपसभापति एवं श्रम, रोजगार तथा सामाजिक सुरक्षामन्त्री डीपी अर्याल र रास्वपाकै सहमहामन्त्री कविन्द्र बुर्लाकोटीको पनि नाम जोडिएको विषय संसद्मा उठाइएको छ ।

मंगलबार प्रतिनिधिसभा बैठकमा नेपाली कांग्रेसका सांसद रामकृष्ण यादवले गोर्खा मिडियाका अध्यक्ष जीबी राईलाई अस्वाभाविक रूपमा त्यहाँ भित्र्याइएको पाइएको बताए ।

“श्रममन्त्री डीपी अर्याल हाम्रो कृषि सहकारीको उपाध्यक्ष हुँदा निक्षेपकर्ताले चार करोड बढी फिर्ता नपाएको विषय छ । अर्याल मात्रै होइन, सोही सहकारीमा रास्वपाका सहमहामन्त्री कविन्द्र बुर्लाकोटी सञ्चालक थिए । अचम्म त के छ भने सो सहकारीमा पनि अस्वाभाविक रूपमा गोर्खा मिडियाका अध्यक्ष जीबी राईलाई भित्र्याइएको छ । त्यो भित्र्याउने काम श्रममन्त्रीको हो भन्ने आरोप छ,” उनले भने ।

• गृहमन्त्रीलाई सांसदले भने– यो आरोपले तपाईंलाई कहिल्यै छोड्ने छैन, जिन्दगीभर लखेट्नेछ 

समस्याग्रस्त सहकारीमाथिको छानबिन प्र्रभावित पार्न खोजिएको समाचार सार्वजनिक भइरहेको उनले उल्लेख गरे । उनले सहकारी ठगी प्रकरणका विषयमा छानबिन गर्न संसदीय समिति आवश्यक भएकामा जोड दिए ।

“यो घटनाले थप पुष्टि भएको छ, सहकारीको ठगी सञ्जाल कसरी फैलिरहेको छ । त्यसकारण हामी भनिरिहको छौँ– निष्पक्ष छानबिन आवश्यक छ । संसदीय छानबिन समिति बनाऔँ,” सांसद यादवले भने ।