काठमाडौं । प्रमुख प्रतिपक्ष दल नेपाली कांग्रेसका सांसद प्रदीप पौडेलले श्रम मन्त्रालयले रुसमा श्रम स्वीकृति किन दिएको भन्दै प्रश्न गरेका छन् । सोमबार प्रतिनिधिसभा बैठकको विशेष समयमा उनले मानव तस्करलाई अनुकूल हुने गरी किन श्रम स्वीकृति दिइयो भन्दै प्रश्न गरे ।

रुसी सेनामा भर्ती भएका मानिसको यकिन तथ्यांक समेत नराख्ने सरकारले किन नागरिकलाई फेरि त्यहीँ पठाउन स्वीकृति दिएको भन्दै उनले आपत्ति जनाए । उनले भने, “यति बेला श्रम मन्त्रालये श्रम स्वीकृति किन दियो ? मानव तस्करलाई अनुकूल हुने गरी किन दियो ? यसभित्र गम्भीर स्वार्थ लुकेको देखेका छौँ ।”

सांसद पौडेलले पञ्चशीलको कूटनीति अपनाउने देशले कुनै मुलुकको सेनामा भर्ती हुन पठाउन मिल्छ भन्दै थप प्रश्न गरे । “१८ घण्टा काम गर्दा पनि ४० हजार बढी कमाउन सक्दैन । पैसा कमाइन्छ भन्ने झुटो हो । त्यसैले उनीहरू सेनामा भर्ती हुन जान्छन्,” उनले भने ।

रुसी सेनामा कति नेपाली भर्ना भएका छन्, अवस्था के छ, आफन्त कुन पीडामा छन् भन्ने सरकार बेखर भएको र खोजी गर्ने चेस्टा समेत नगरेको उनले आरोप लगाए । उनले जिम्मेवार परराष्ट्रमन्त्री नै विदेश भ्रमणमा गएर के सन्देश दिन खोजेको भन्दै प्रश्न गरे ।

“कम्तीमा पनि ७०० नेपाली छन्, ४० जना मरेका छन् । लास आउन नसकेर कुसको प्रतीक बनाएर किरिया गरिएको छ । ११७ घाइते छन् । ३०० बेपत्ता छन् । थुप्रै देश फर्किन फाराम भरेर बसेका छन्,” उनले भने, “सरकार उद्धार गर्न परै जाओस्, यकिन तथ्यांक पत्ता लगाउन कोसिस छैन । युक्रेनमा पनि बन्दी बनेको सार्वजनिक गरिएको छ । नेपालको परराष्ट्र मन्त्रालय र यसको संयन्त्रले के गरेको छ ?”

सांसद पौडेलले आफूले नसक्ने भए रेडक्रस, संयुक्त राष्ट्रसंघलाई अनुरोध गरेर भए पनि त्यहाँ रहेका नागरिकलाई स्वदेश फर्काउन पहल गरिनुपर्नेमा जोड दिए ।

फरक प्रसंगमा उनले राजनीतिक रङ पनि छिर्न दिन्न भन्दै शिक्षा मन्त्रालयको जिम्मेवारी सम्हाल्न पुगेका मन्त्रीले कहाँ परिवर्तन गरिसकेको भन्दै प्रश्न गरे । कर्मचारीलाई पन्छाएर करारमा भर्ती गर्ने विषय बाहिर आएको भन्दै उनले यी विषयमा सदनमा जानकारी गराउन माग गरे ।

उनले काठमाडौं विश्वविद्यालय (केयू)ले नेपालमै पहिलोपटक हाइड्रोजन उत्पादन गरी इन्धनका रूपमा प्रयोग थालेकामा प्रशंसा गरे । यसले इन्धन खपतमा कमी आउने उनले विश्वास व्यक्त गरे ।