काठमाडौं । नेपाली कांग्रेसका सचेतक सुशीला थिङले बाल सुधारगृहमा तत्काल विद्यालयको व्यवस्था गर्न माग गरेकी छन् । आइतबार प्रतिनिधिसभा बैठकमा उनले यस्तो माग गरेकी हुन् ।
“बाल सुधारगृहमा विद्यालय सञ्चालन गर्नुपर्छ कि पर्दैन ? तत्काल बालसुधार गृहमा विद्यालय सञ्चालन गरियोस्,” उनले भनिन् ।
नेपालमा आठ बाल सुधारगृह छन् । सरकारले सञ्चालन गरेका चार बाल सुधारगृहमा विद्यालय नभएको उनले जानकारी गराइन् ।
उनले कानुन, न्याय तथा मानवअधिकार समितिका सदस्यहरूको टोलीले मोरङ, सुनसरी र धनकुटाको बालसुधार र कारागार अवलोकनका क्रममा देखेको दृश्य पनि सुनाइन् । मोरङको बाल सुधारगृहमा ५० जनाको क्षमता भए पनि २२२ बालक रहेका उनले बताइन् ।
बाल सुधारगृहमा रहेका बालबालिका तीनतले बेड बनाएर बसेका बताउँदै उनले भौतिक संरचना बनाउनुपर्नेमा जोड दिइन् । “सरकारले तत्काल बाल सुधारगृहको भौतिक संरचना नगर्ने हो भने सुधारगृह हुनेवाल छैन,” सांसद थिङले भनिन् ।
उनले २५ वर्षीय व्यक्तिलाई बिनाहतियार १९ वर्षको प्रहरी जवानले कसरी सुरक्षा गर्ने भन्दै प्रश्न पनि गरिन् । “हामीले यस्तो दुर्लभ दृष्य देख्यौँ । १९ वर्षको प्रहरी जवानले २५ वर्षको बाल सुधारगृहको लक्का जवानलाई बिनाहतियार सुरक्षा गरिरहेको दृश्य देख्यौँ । गृह मन्त्रालयले यसलाई कसरी हेरिरहेको छ ?,” उनले प्रश्न गरिन् ।
