काठमाडौं । इन्डियन प्रिमियर लिग (आईपीएल) मा कोलकाता नाइट राइडर्सले रोयल च्यालेन्जर्स बेंगलुरुविरुद्ध सात विकेटको सहज जित निकालेको छ ।

शुक्रबार एम चिन्नास्वामी रंगशालामा सम्पन्न खेलमा बेंगलुरुले प्रस्तुत गरेको १८३ रनको लक्ष्य कोलकाताले १६.५ ओभरमा तीन विकेट गुमाएर पूरा गर्‍यो ।

कोलकाताको जितमा वेन्कटेस ऐयरले ५० रन बनाए । उनले ३० बलमा तीन चौका र चार छक्का प्रहार गरे । सुनिल नारिनले २२ बलमा दुई चौका र पाँच छक्कासहित ४७ रन बनाए । कप्तान श्रेयस ऐयरले ३९ र फिल साल्टले ३० रन बनाए ।

बेंगलुरुका यस दयाल, मयंक दागर र विजयकुमार भास्यकले समान एक विकेट लिए ।

त्यसअघि टस हारेर ब्याटिङमा आएको बेंगलुरुले निर्धारित २० ओभरमा ६ विकेट गुमाएर १८२ रनको योगफल खडा गरेको थियो ।

बेंगलुरुका विराट कोहलीले ८३ रन बनाए पनि टिमलाई हारबाट जोगाउन सकेनन् । उनले ५९ बलमा चार चौका र चार छक्का प्रहार गरेका थिए । 

क्यामरुन ग्रीनले ३३, ग्लेन म्याक्सवेलले २८ र दिनेश कार्तिकले २० रन थपे । 

कोलकाताका हर्षित राना र आन्द्रे रसेलले समान दुई विकेट लिए । सुनिल नारिनले एक विकेट हात पारे ।

प्रतियोगितामा लगातार दुई जित निकालेको कोलकाता तालिकाको दोस्रो स्थानमा उक्लिएको छ । समान खेलबाट दुई अंक जोडेको बेंगलुरु तालिकाको छैटौँ स्थानमा छ ।