काठमाडौं । नेकपा (माओवादी केन्द्र)को पत्रकार संगठन प्रेस सेन्टर नेपालले राष्ट्रिय स्वतन्त्र पार्टी (रास्वप)बाट इलाम–२ का लागि उमेदवार बनेका मिलन लिम्बुलाई कारबाही गरेको छ ।

प्रेस सेन्टरका सचिवसमेत रहेका लिम्बुले 'चरम अवसरवादी प्रवृत्ति' देखाएकाले उनलाई कारबाही गरिएको प्रेस सेन्टरमा महासचिव सन्तोष पौडेलले बताएका छन् ।

पौडेलले जारी गरेको प्रेस विज्ञप्तिमा लिम्बुलाई संगठनको सबै जिम्मेवारीबाट हटाइएको उल्लेख छ ।

"संठनको नीति, विधि, विधान र आचरणविपरीत विगत केही समयदेखि सामाजिक सञ्जाल र मिडियामार्फत सार्वजनिक अभिव्यक्ति दिने तथा अनुशासनविपरीत गतिविधि गरिरहेको, पछिल्लो समयमा राष्ट्रिय स्वतन्त्र पार्टीको तर्फबाट निर्वाचनमा उम्मेदवार बनेको देखिएको," विज्ञप्तिमा भनिएको छ ।

प्रेस सेन्टरको अनुशासन समितिको सिफारिसमा उनलाई जिम्मेवारीबाट हटाइएको विज्ञप्तिमा उल्लेख छ ।