काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले उद्योगी व्यवसायीहरूले अर्थतन्त्रको सकारात्मक सन्देश दिनसके तत्काल लयमा आउने बताएका छन् । शुक्रबार नेपाल निर्माण व्यवसायी महासंघको हेटौँडामा भएको २५औँ वार्षिक साधरणसभामा बोल्दै अध्यक्ष ढकालले यस्तो बताएका हुन् ।

उनले उद्योगी व्यवसायीहरूले मनोबल कमजोर भयो, व्यावसायिक वातावरण भएन भन्दा पनि सकारात्मक रूपमा सोच्न आवश्यक रहेको बताए । उद्योगी व्यवसायीहरूलाई मुलुकको अर्थतन्त्र सकारात्मक दिशामा रहेको सन्देश दिनसके छोटो समयमा व्यवसायीहरूले चाहेको जस्तो आर्थिक विकास हुनसक्ने विश्वास व्यक्त गरे । 

उनले अब उद्योगी व्यवसायीहरूले निराशको मात्रै कुरा गरेर, व्यावसायिक वातावरण छैन भनेर निराश हुन आवश्यक नभएको बताए । मुलुकको बाह्य अर्थतन्त्र विदेशी विनिमय सञ्चिति, रेमिट्यान्स, पर्यटक वृद्धि र बैंकमा तरलता सकारात्मक रहेको बताए ।