काठमाडौं । ललितपुर महानगरपालिका–२६, ढोलाहिटीमा २८ वर्षीय रेवाज राई र ३० वर्षीय प्रजन राईको हत्या आरोपमा पक्राउ पर्नेको संख्या १८ पुगेको छ । होली खेल्ने क्रममा उत्पन्न विवादका कारण चक्कु प्रहारबाट राईद्वयको हत्या गरिएको खुलेको छ ।

रेवाजको तिघ्रा र प्रजनको छातीमा चक्कु प्रहार गरेर हत्या गरिएको प्रहरीले जनाएको छ । पक्राउ परेकासँग प्रहरीले थप सोधपुछ जारी राखेको छ ।

रेवाजको शव पाटन अस्पताल र प्रजनको शव सुमेरु अस्पतालमा राखिएको छ । जिल्ला प्रहरी परिसर ललितपुरका प्रमुख एवं एसएसपी शेखर खनालले ज्यान गुमाएका व्यक्ति र आरोपित सबै एकापसमा चिनजानकै युवा रहेका बताए ।

उनले बाह्रखरीसित भने, “सबै साथीहरू नै रहेको खुलेको छ । रेस्टुरेन्टमा सँगै बसेर उनीहरूले मदिरा खाएको देखिन्छ । पछि रेस्टुरेन्टमै विवाद हुँदा दुईजनामाथि चक्कु प्रहार भएको हो ।”

युवा र रेस्टुरेन्ट सञ्चालकका दुई समूहबीच झडप भएको हो । चक्कु प्रहारलगत्तै केही युवक फरार भएका थिए । सँगै मदिरा सेवन गरेका केही साथीले घाइतेलाई अस्पताल पुर्‍याएको खुलेको छ । अस्पताल पुर्‍याइएलगत्तै चिकित्सकले रेवाज र प्रजनलाई मृत घोषणा गरेका थिए ।

घटना विजय राईको पपिना रेस्टुरेन्टमा भएको प्रहरी अनुसन्धानमा खुलेको छ । प्रहरीले उनलाई समेत नियन्त्रणमा लिएको छ । उनीबाहेक थप १७ जनालाई प्रहरी वृत्त चापागाउँको टोलीले नियन्त्रणमा लिएको हो ।

मदिरा सेवन गर्न रेस्टुरेन्ट पुगेका युवा र सञ्चालकबीच विवाद हुँदा घटना भएको प्रहरी स्रोतको भनाइ छ ।

चक्कु प्रहार गर्ने विजय राई नै रहेको प्रहरीको दाबी छ । उनीहरूबीच पुरानो केही रिसइबी पनि देखिएको छ ।

प्रहरीका अनुसार, आइतबार राति ९ बजेतिर घटना घटेको थियो । घाइतेलाई राति करिब ११ बजे मात्र अस्पताल पुर्‍याइएको थियो । घटना शंकास्पद देखिएपछि अस्पताल प्रशासनले प्रहरीलाई खबर गरेको थियो ।

त्यसलगत्तै ललितपुर प्रहरीका एसएसपी खनाल समेत घटनास्थलमा पुगेका थिए । घटनामा चक्कु प्रहार गर्ने र अरू व्यक्तिको भूमिकाबारे अनुसन्धान जारी राखिएको प्रहरीले जनाएको छ ।