काठमाडौं । इन्डियन प्रिमियर लिग (आईपीएल)मा गुजरात टाइटन्सले मुम्बई इन्डियन्सविरुद्ध ६ रनको रोमाञ्चक जित निकालेको छ । आइतबार नरेन्द्र मोदी रंगशाला अहमदाबादमा गुजरातले प्रस्तुत गरेको १६९ रनको लक्ष्य पछ्याउने क्रममा मुम्बईले निर्धारित २० ओभरमा नौ विकेट गुमाएर १६२ रन मात्र जोड्न सक्यो ।
मुम्बईलाई जितका निम्ति अन्तिम ओभरमा १९ रन आवश्यक थियो । उमेश यादवले गरेको पहिलो र दोस्रो बलमा क्रमश, छक्का र चौका प्रहार गर्दै मुम्बईका कप्तान हार्दिक पन्ड्याले जितको सम्भावना कायम राखेका थिए । तर, तेस्रो बलमा उमेशले हार्दिकलाई राहुल तेवातियाबाट क्याच गराए । चौथो बलमा पनि उमेशले मुम्बईका पियुश चावलालाई राशिद खानबाट क्याच गराउँदै खेल गुजरातको पक्षमा ल्याएका थिए ।
मुम्बईलाई जितका लागि अन्तिम दुई बलमा नौ रन आवश्यक थियो । तर, मुम्बईले दुई रन मात्र जोडेपछि गुजरातले ६ रनको रोमाञ्चक जित निकालेको हो ।
मुम्बईका डेवाल्ड ब्रेविसले ४६ र कप्तान रोहित शर्माले ४३ रन जोडे पनि टिमको हार टार्न सकेनन् । १२.१ ओभरमा १०७–३ को सहज अवस्थामा रहे पनि मुम्बईले बाँकी ७.५ ओभरमा ६ विकेट गुमाएर ५५ रन मात्र जोड्न सक्यो ।
यस्तै, तिलक वर्माले २५, नमन धीरले २० रन जोड्दा टिम डाविड र कप्तान हार्दिक पन्ड्याले समान ११ रन बनाए ।
गुजरातका अज्मतुल्लाह ओमरजाई, उमेश यादव, स्पेन्सेर जोन्सन र मोहित शर्माले समान दुई विकेट लिए । साई किशोरले एक विकेट हात पारे ।
त्यसअघि, टस हारेर ब्याटिङमा उत्रिएको गुजरातले २० ओभरमा ६ विकेट गुमाएर १६८ रन बनाएको थियो ।
गुजरातका साई सुदर्शनले ४५ रन जोडे । कप्तान शुभमन गिलले ३१, राहुल तेवातियाले २२, रिद्दिमान साहाले १९, अज्मतुल्लाह ओमरजाईले १७ र डाविड मिलरले १२ रन थपे ।
मुम्बईका जसप्रित बुमराहले तीन विकेट लिए । चार ओभर बलिङ गरेका बुमराहले १४ रन मात्र खर्चिए । गेराल्ड कोएट्जीले दुई र पियुश चावलाले एक विकेट हात पारे ।
जितसँगै दुई अंक जोडेको गुजरात तालिकाको चौथो स्थानमा उक्लिएको छ । हारबाट प्रतियोगिताको सुरुआत गरेको मुम्बई सातौँ स्थानमा छ । मुम्बईले सन् २०१३ को संस्करणयता आईपीएलको पहिलो खेलमा जित निकाल्न सकेको छैन ।
प्रतियोगितामा आज पञ्जाब किंग्स र रोयल च्यालेन्जर्स बैंगलोरबीच प्रतिस्पर्धा हुनेछ ।
