काठमाडौं । इन्डियन प्रिमियर लिग (आईपीएल)को १७औँ संस्करण आज (शुक्रबार)देखि सुरु हुँदैछ । प्रतियोगिताको पहिलो खेलमा आज फाफ डू प्लेसिसको कप्तानीमा रहेको रोयल च्यालेन्जर्स बेंगलोर र रितुराज गाइकवाडको कप्तानीमा रहेको चेन्नाई सुपर किंग्सबीच प्रतिस्पर्धा हुँदै छ ।

प्रतियोगिताअघि बेंगलोरका पूर्वकप्तान विराट कोहलीले आईपीएलमा चेन्नाईसँग खेल्नु सधैँ विशेष अवसर हुने प्रतिक्रिया दिएका छन् ।

“चेन्नाईविरुद्ध खेल्नु पक्कै पनि सधैँ एक विशेष अवसर हुन्छ । एक ठूलो खेल । यसलाई दक्षिणी डर्बी पनि भनिन्छ,” कोहलीले भने, “भावुक चेन्नाई समर्थकमाझ खेल्न पाउनु राम्रो हो । र, खेलमा धेरै समयपछि महेन्द्रसिंह धोनीसँग भेट्न पाउँदा उत्साहित छु ।”

विराटको नाममा आईपीएलमा सबैभन्दा धेरै रन बनाउने कीर्तिमान छ । उनले विश्वकै सबैभन्दा ठूलो फ्रेन्चाइज लिगमा २३७ खेल खेल्दा सात शतक र ५० अर्धशतकसहित सात हजार २६३ रन बनाएका छन् ।

आज साविक विजेता समेत रहेको चेन्नाई र बेंगलोर एमए चिदम्बरम रंगशालामा भिड्दै छन् । यो खेल नेपाली समयानुसार राति ८ः१५ बजेदेखि सुरु हुनेछ ।