काठमाडौं । उदयपुर र हेटौँडा सिमेन्ट उद्योगलाई व्यवस्थित गरी सरकारले नै सञ्चालन गर्नुपर्नेमा सांसदहरूले जोड दिएका छन् । प्रतिनिधिसभाअन्तर्गतको उद्योग तथा वाणिज्य र श्रम तथा उपभोक्ता हित समितिको बिहीबारको बैठकमा सांसदहरूले यस्तो माग गरेका हुन् ।

सरकारद्वारा सञ्चालित उद्योगले निजी क्षेत्रसँग प्रतिस्पर्धा गर्न सक्नुपर्नेमा पनि उनीहरूले जोड दिए । सांसदहरूले उदयपुर र हेटौँडा सिमेन्ट उद्योग सञ्चालन गर्न सक्ने आँट र क्षमता छ ? भन्दै उद्योगमन्त्रीलाई प्रश्न गरे ।

उनीहरूले सरकारले सञ्चालन गरेका उद्योग आर्थिक रूपमा धराशायी हुनु चिन्ताको विषय रहेको बताए । निजी क्षेत्रसँग प्रतिस्पर्धा गर्न सक्ने र नाफामा लैजाने गरी उद्योग सञ्चालन गर्नुपर्ने उनीहरूले औँल्याए ।

नेपाली कांग्रेसका सांसद राजु थापाले उद्योगमन्त्री दामोदार भण्डारीलाई ‘उद्योग चलाउन सक्ने आँट छ ?’ भनी प्रश्न गरे । उद्योग चलाउँछु भन्ने इच्छाशक्ति हुन आवश्यक रहेको उनले बताए ।

पञ्चायतकालमा सुरु उद्योग प्रजातन्त्र आएपछि धराशायी भएको उनले उल्लेख गरे । सरकारी उद्योगलाई मन्त्रीको पार्टीका कार्यकर्ता भर्तीकेन्द्र बनाइँदा नाफामा जान नसकेको उनको भनाइ छ ।

नेकपा (एमाले)का सांसद हेमराज राईले उदयपुर र हेटौँडा सिमेन्ट उद्योग सरकारले सञ्चालन गर्ने वा निजी साझेदारीमा सञ्चालन गर्ने भन्ने विषयमा राजनीतिक प्रतिबद्धता आवश्यक रहेको औँल्याए ।

राष्ट्रिय स्वतन्त्र पार्टी (रास्वपा)का सांसद गणेश पराजुलीले सरकार आफैँले सञ्चालन गर्दा समेत जर्जर अवस्थामा उद्योग पुग्नुको वास्तविकता अध्ययन र समीक्षा गर्न आवश्यक रहेको बताए ।

कांग्रेस सांसद रमा कोइराला पौड्यालले निजी क्षेत्रले चलाएका उद्योग नाफामा जाने तर सरकारबाट सञ्चालित धराशायी हुनु चिन्ताको विषय भएको बताइन् । यस्ता उद्योगलाई कसरी नाफामा लैजाने भन्ने विषयमा सरकारले सोच्नुपर्नेमा उनले जोड दिइन् ।

एमाले सांसद लालप्रसाद सावाँ लिम्बूले उदयपुर र हेटौँडा सिमेन्टको गुणस्तर राम्रो हुँदा पनि बजार व्यवस्थापन गर्न नसक्दा धराशायी बनेको बताए । उनले उद्योगलाई व्यवस्थित बनाउन सरकारले नयाँ रणनीति तय गर्नुपर्ने सुझाव दिए । न्युज एजेन्सी नेपाल