विराटनगर । नेकपा (एमाले) कोसी प्रदेशले नयाँ सरकार गठनका निम्ति मार्गप्रशस्त गर्न आग्रह गरेको छ ।

कोसी प्रदेशका मुख्यमन्त्री केदार कार्कीले पदबाट राजीनामा दिए आफूहरूले सरकार गठन गर्ने एमाले संसदीय दलका प्रमुख सचेतक रेवतीरमण भण्डारीले बताए । उनले भने, “कार्की नेतृत्वको सरकार अल्पमतमा परिसकेको छ, अब उहाँले राजीनामा दिनु नै उत्तम हो ।”

शुक्रबार विराटनगरमा आयोजित पत्रकार सम्मेलनमा भण्डारीले राजीनामा नआए आफूहरू प्रक्रियामा जाने बताए । केन्द्रमा गठबन्धन फेरिएसँगै आफूहरूसँग प्रदेशमा ५८ सांसदको साथ रहेको उनले जिकिर गरे ।

“अब संसद् चल्दा सत्तापक्षमा २९ जना सांसद हो, हाम्रोतिर ५८ हुनुहुन्छ । के हो, सुहाउँदो देखिएला ?,” भण्डारीले भने, “सरकार गठबन्धनको बन्छ । अब केन्द्रबाट कसले नेतृत्व लिने भन्ने निर्णय भएपछि हामी अघि बढ्छौँ ।”

कोसी प्रदेशसभा विघटनको सम्भावना नदेखिएको, बरु यो सरकार ढल्ने उनको भनाइ छ ।

अब प्रदेश प्रमुखको स्वविवेकानुसार संविधानको धारा १६८ को उपधारा २ अथवा दुई दल ‘मर्ज’ भए उपधारा १ अनुरूप पनि सरकार गठन हुन सक्ने उनले बताए ।