काठमाडौं । आर्थिक मन्दीका कारण सुस्ताएको घरजग्गा कारोबार चलायनमा हुन सकेको छैन । व्यवसायी लामो समयदेखि कारोबार बढ्ने अपेक्षा गरिरहेका छन् । तर, सरकारी तथ्यांक हेर्दा न कारोबार सुधार भएको छ न राजस्व संकलन ।

भूमि व्यवस्था तथा अभिलेख विभागको तथ्यांकानुसार, चालु आर्थिक वर्ष २०८०/०८१ को फागुनमा ५० हजार ९९८ लिखत पारित भएको छ । गएको माघमा ५० हजार ९२१ लिखत पारित भएको थियो । माघमा भन्दा फागुनमा कारोबार बढ्ने व्यवसायीको अपेक्षा थियो ।

यस्तै, राजस्व संकलनमा पनि उल्लेखीय सुधार देखिएको छैन । फागुनमा तीन अर्ब ५९ करोड २६ लाख ९१ हजार ८१ रुपैयाँ राजस्व संकलन भएको छ । माघमा तीन अर्ब ३७ करोड ५७ लाख ४६ हजार २३१ रुपैयाँ राजस्व संकलन भएको थियो ।