काठमाडौं । नेकपा (माओवादी केन्द्र)का सांसद तथा पूर्वअर्थमन्त्री जनार्दन शर्माले राष्ट्रिय सहमतिबाट मात्रै राष्ट्र अघि बढ्ने बताएका छन् ।

बिहीबार प्रतिनिधिसभाको बैठकमा निर्माणमुखी सामग्री (व्यवस्थापन तथा नियमन) विधेयकमाथिको छलफलका क्रममा उनले सहमतिको प्रक्रियाबाहेक द्वन्द्वको प्रक्रियाबाट राष्ट्र अगाडि बढ्न नसक्ने बताएका हुन् ।

“देश बनाउन सक्छौँ, हामी गर्न सक्छौँ, सम्भव छ । सहमतिको प्रक्रियाबाहेक द्वन्द्वको प्रक्रियाबाट राष्ट्र अगाडि बढ्न सक्दैन्,” शर्माले भने ।

एक–अर्कामाथि दोषारोपण गर्ने परम्पराबाट राष्ट्र बन्न नसक्ने उनको भनाइ छ । “एकले गरेको राम्रो काम अर्काेले विरोध गर्ने, एकले ल्याएको नीतिको अर्काेले काट्ने, एकले ल्याएको बजेट अर्काे काट्ने जो परम्परा छ, यस गलत परम्पराबाट देश अघि बढ्न सक्दैन । हामीले राष्ट्रिय सहमतिको आधारमा अगाडि जाने संकल्प गर्‍यौँ भने हाम्रो देश किन बन्न सक्दैन,” उनले भने ।