काठमाडौं । राष्ट्रिय स्वतन्त्र पार्टी (रास्वपा)का सांसद गणेश पराजुलीले नेपाली कांग्रेसले ‘किस्तीमा राखेर रवि लामिछानेलाई प्रधानमन्त्रीको अफर गर्दा अहिले उठाएको विषय कहाँ थियो ?’ भनी प्रश्न गरेका छन् ।

बिहीबार संसद् भवन नयाँ बानेश्वरमा सञ्चारकर्मीसँग उनले अहिले कांग्रेसका सांसदले उपप्रधान एवं गृहमन्त्री लामिछानेमाथि विभिन्न प्रश्न खडा गरेको उल्लेख गरे । तर, ‘प्रधानमन्त्रीको अफर गर्दा कांग्रेसले अहिले उठाएको विषय कहाँ थियो ?’ भनी उनले प्रश्न गरेका हुन् ।

उनले राजनीतिको आफ्नै मूल्य–मान्यता हुने बताए । आफ्नो पक्षमा रहँदा राम्रो र नहुँदा नराम्रो देख्ने प्रवृत्तिको अन्त्य हुनुपर्नेमा उनले जोड दिए ।

पराजुलीले कांग्रेसले तत्कालीन अवस्थामा रास्वपालाई प्रधानमन्त्रीको अफर देश र जनताको हितमा गरेको थियो वा अर्को समीकरणलाई ढाल्नका लागि मात्रै गरिएको थियो भन्ने विषय जिम्मेवार राजनीतिक दलले बुझ्नुपर्ने बताए । उनले अहिले कोही व्यक्तिलाई जबरजस्ती दोषी देखाउनेभन्दा पनि सहकारीका ऋणीलाई न्याय दिनु मुख्य विषय भएको औँल्याए । उनीहरूलाई न्याय दिलाएरै छाड्ने सांसद पराजुलीको भनाइ छ ।

उनले सहकारीबारे लामिछानेमाथि उठाइएका विषयमा निष्पक्ष छानबिन गर्न गृह मन्त्रालयले हस्तक्षेप नगर्ने जिकिर गरे । हिमालयन टेली भ्वाइस