काठमाडौं । नेपाल राष्ट्र बैंकका गभर्नर महाप्रसाद अधिकारीले राष्ट्र बैंक र अर्थतन्त्रका सूचनाको सही विश्लेषण हुनुपर्ने बताएका छन् । मंगलबार काभ्रेमा आयोजित एक कार्यक्रममा उनले यस्तो बताएका हुन् ।

अर्थतन्त्र र राष्ट्र बैंकसँग जोडिएका तथ्यांक र सूचना जटिल प्रकृतिका र प्राविधिक हुने भन्दै उनले त्यसलाई सर्वसाधारणले सहज ढंगले बुझिने भाषामा प्रस्तुत गर्नुपर्ने आवश्यकता औँल्याए ।

“राष्ट्र बैंक र अर्थतन्त्रका सूचना र तथ्यांकहरू प्रशस्त छन् । तर, यसको  सही र सरल विश्लेषण हुनु जरुरी छ,” गभर्नर अधिकारीले भने, “संस्थाहरूमा रहेका राष्ट्रिय तथा अन्तर्राष्ट्रियस्तरका आर्थिक तथ्यांकहरू आर्थिक पत्रकारहरूले जनताले बुझ्ने ढंगले प्रस्तुत गरेर जनतासम्म पुर्‍याउन जरुरी छ ।”