काठमाडौं । रसिया–युक्रेनको युद्धमा नेपालीले ज्यान गुमाइरहेको र नेपाली आमाका छोराछोरीलाई ज्यान बचाउनको लागि भन्दै राष्ट्रिय प्रजातन्त्र पार्टी (राप्रपा)ले जरुरी सार्वजनिक प्रस्ताव दर्ता गराएको छ । 

पार्टीले बिहीबार संघीय संसद् सचिवालयको कार्यव्यवस्था परामर्श समितिमा जरुरी सार्वजनिक महत्त्वको प्रस्ताव दर्ता गराएको पार्टी प्रमुख सचेतक ज्ञानबहादुर शाहीले जानकारी दिए । 

“नेपाली आमाका हजारौँ राष्ट्र सपुतहरूविना कारण सीमित आर्थिक प्रलोभनमा परी रसिया र युक्रेनबीचको युद्धमा सहभागी गराइएको अन्तर्राष्ट्रिय जगतमै जघन्य अपराध ठानिने मानव तस्करी गरी युद्धस्थलमा लगी सयौँ घाइते र कयौँको मृत्यु भएको हुँदा यो नेपालको सार्वभौम प्रतिनिधिसभा, यस्तो जघन्य अपराधको विषयमा छलफल गर्नुपर्ने र सम्बन्धित मन्त्रालय र सरकारलाई ध्यानाकर्षण गराउनुपर्ने अत्यन्त आवश्यक भएको हुँदा नेपाली आमाका छोराछोरीलाई ज्यान बचाउनको लागि जरुरी सार्वजनिक प्रस्ताव पेस गरेका हौँ” शाहीले भने । 

साथै पार्टीले रसिया र युक्रेनबीचको युद्धमा मृत्यु भएको र युद्धमा फसेकाले तत्काल उद्धार गरिदिनु हुन अत्यावश्यक छलफल हुनुपर्ने उल्लेख गरेको छ ।