काठमाडौं । पश्चिम एसियन फुटबल फेडेरेसन महिला च्याम्पियनसिप (वाफ)को फाइनलमा आज नेपाली राष्ट्रिय महिला टिमले उपाधिका निम्ति जोर्डनसँग खेल्दै छ ।

प्रतियोगितामा पाहुना टिमका रूपमा सहभागिता जनाएको नेपालले फाइनलसम्मको यात्रा तय गर्ने क्रममा अन्तिम–४ मा लेबनानलाई हराएको थियो ।

उता, प्रतियोगिताकै सबैभन्दा सफल टिम जोर्डनले सेमिफाइनलमा प्यालेस्टाइनलाई हराउँदै फाइनल यात्रा तय गरेको थियो । जोर्डनले हालसम्म पाँचपटक प्रतियोगिताको उपाधि जितेको छ ।

साउदी अरेबियाको प्रिन्स अब्दुल्लाह अल फैसल रंगशालामा फाइनल खेल नेपाली समयानुसार राति ९ः१५ बजे सुरु हुनेछ ।

नेपाली टिमकी प्रमुख फरवार्ड सावित्रा भण्डारी फाइनलमा उपलब्ध नहुने भएकी छन् । फ्रेन्च क्लबमा अनुबन्धित सावित्राले फिफा विन्डो समाप्त भइसकेको हुँदा फाइनल नखेल्ने भएकी हुन् । फ्रान्स जाने सावित्रालाई आज नेपाली टिमले साउदी अरेबियाबाट नै बिदाइ गरेको छ ।