काठमाडौं । विश्वकै प्रमुख विद्युतीय सवारीसाधन (ईभी) र पावर ब्याट्री उत्पादक बीवाईडीले आफ्नो पहिलो प्रिमियम उप–ब्रान्ड अन्तर्गतको इलेक्ट्रिक ‘सुपरकार’ सार्वजनिक गरेको छ । बीवाईडीले याङवाङ ब्रान्डअन्तर्गत यू९ मोडलको ‘सुपरकार’ सार्वजनिक गरेको हो ।

यो गाडीको बिक्री मूल्य चीनमा १६ लाख ८० हजार युआन रहेको छ । जुन करिब तीन करोड नेपाली रुपैयाँ बराबर हो ।

‘टाइम गेट’ डिजाइनको भाषालाई अनुशरण गर्दै ‘याङवाङ यू९’ले विशिष्ट सौन्दर्य, नयाँ समानुपात र पावरसहित पूर्ण इलेक्ट्रिक सुपरकार प्रतिबिम्बित गर्ने कम्पनीले बताएको छ ।

ई४ प्लेटफर्म र डिसस–एक्स बडीलाई नियन्त्रण गर्ने बौद्धिक प्रणाली याङवाङ यू९मा बलियो ट्र्याक प्रदर्शन, सडक अनुकूलता र रमाइलो विशेषता रहेको छ ।

ई४ प्लेटफर्म चार स्वतन्त्र इलेक्ट्रिक मोटर हुने पावर सिस्टम हो । यसले चार वटै पांग्रालाई स्वतन्त्र ट्वर्क उपलब्ध गराउँदै सुरक्षा, पर्फमेन्स र विशेष अनुभव दिन्छ । याङवाङ यू९ मा एक हजार ३०० हर्सपावर र अधिकतम एक हजार ६८० एनएमको ट्वर्क क्षमता छ ।

बीवाईडी डिसस–एक्स इन्टेलिजेन्ट बडी नियन्त्रण प्रणाली गाडीको अर्को नयाँ विशेषता हो । यसले याङवाङ यू९ को सस्पेन्सनलाई उच्चतम ७५ एमएमसम्मको यात्रा गर्न दिने कम्पनीको भनाइ छ ।

गाडीको ५०० एमएम प्रतिसेकेन्डको सिंगल–एक्सिस लिफ्टिङ स्पिड र अधिकतम एक टनभन्दा बढीको भार उठाउने क्षमताले ब्रेकिङ, एक्सिलेरेसन, मोडाई र रोडको जस्तो अवस्थामा पनि जुनसुकै परिस्थितिमा पनि चालक र यात्रुलाई उत्कृष्ट ड्राइभिंङ अनुभव प्रदान गर्ने कम्पनीले जनाएको छ । याङवाङ यू९को अधिकतम गति ३०९.१९ किलोमिटर प्रतिघण्टा छ । गाडीले ० देखि १०० किलोमिटर प्रतिघण्टाको गति २.३६ सेकेन्ड दिने कम्पनीको दाबी छ ।

यस्तै ०–४०० एम एक्सिलेरेसन ९.७८ सेकेन्डमा दिने भनिएको छ । यससँगै ट्रयाकमा गरिएको परीक्षणमा यू९ मा अत्यधिक सुधारिएको ताप व्यवस्थापन र ब्लेड ब्याट्री डिस्चार्जिङ प्रविधि छ ।

यसले गाडीमा चिस्यान कायम राख्ने क्षमतामा एकसय प्रतिशत बढेको बीवाईडीले जनाएको छ । तीव्र क्षमताका दुई वटा प्लग–इन चार्जिङ प्रविधिको गाडीमा अधिकतम पाँच सय किलोवाटको चार्जिङ क्षमता छ ।

यसबाहेक  याङवाङ यू९ मा उपलब्ध १२ सेटको सक्रिय र निस्क्रिय एइरोडाइनामिक प्याकेजले ड्र्याग कोइफिसियन्ट कम गर्ने र तापले हुने क्षय घटाउने काम गर्ने कम्पनीको भनाइ छ । 

याङवाङ यू९को सुपर कार्बन–फाइबर क्याबिनलाई गर्मीमा शितलताका लागि सीटीबी प्रविधि प्रयोग गरिएको छ । गाडीले ५४ हजार ४२५ एनएम प्रतिडिग्री मोडको दबाब र छतको एकतर्फी संकुचन भार ११ टनमाथि पुर्‍याएर यात्रा सुरक्षा सुनिश्चित गर्ने बीवाईडीको भनाइ छ ।

याङवाङ यू९ मा रहेको डिलिंक १५० इन्टेलिजेन्ट प्लेटफर्म ४एनएम फाइभ जी चिपबाट सञ्चालित रहेको कम्पनीले जनाएको छ । यसले चीन भित्रका ३० रेस ट्र्याकको विस्तृत जानकारी र ट्र्याक ड्राइभिंग सेवा प्रदान गर्छ ।

याङवाङ यू९को क्याबिनमा १४ तरिकाले समायोजन गर्न मिल्ने दुई सिट छन् । गाडीमा डाइनाडियो एभिडेन्स श्रेणीको उच्च स्तरीय अडियो प्रणाली छ । बीवाईडीले यसरी याङवाङ सुपरकार नयाँ तरिकाले परिभाषित भएको जनाएको छ ।