काठमाडौं । नेपाल वायुसेवा निगमको न्यारोबडी जहाज तीन महिनादेखि ग्राउन्डेड छ ।  निगमको ‘नाइन एन एकेएक्स एयरबस ३२० लुम्बिनी’ जहाज गएको नोभेम्बर ३० अर्थात् मंसिर १४ गते त्रिभुवन अन्तर्राष्ट्रिय विमानस्थलमा ‘ग्राउन्डेड’ भएको थियो ।

राष्ट्रिय ध्वजावाहकको जहाज ‘ग्राउन्डेड’ भएको फागुन १५ गतेसम्म ९० दिन पूरा भएको छ । जहाज ‘ग्राउन्डेड’ भएको डेढ महिनापछि निगमले उक्त जहाज इजरायल पठाएको थियो । 

जहाज लामो सममसम्म जहाज मर्मत भएन । निगम व्यवस्थापनको आलोचना हुन थालेपछि बच्नकै लागि मर्मतको टुंगो नलगाइकन जहाज इजरायल पठाएको थियो । 

जसकारण ४९ दिन पुग्दा पनि जहाज मर्मत भइसकेको छैन । जनवरी १२ अर्थात् पुस २७ गते जहाज इजरायलस्थित आईएआई पठाएको थियो । तर, जहाज मर्मत कहिलेसम्म हुन्छ भन्ने विषयमा अझै टुंगो नलागेको निगम स्रोत बताउँछ ।

“मर्मत भएर कहिलेदेखि उडान हुन्छ भन्ने विषयमा नै टुंगो छैन । अब दुई÷चार दिनमा जानकारी आउँछ भन्ने कुरा छ,” निगम स्रोतले बाह्रखरीसँग भन्यो ।

निगमले एउटा न्यारोबडीबाट दैनिक एक करोड १५ लाख रुपैयाँ आम्दानी गर्छ ।  यो रकम निगमले आफैँले सार्वजनिक गरेको तथ्यांक हो ।  उक्त तथ्यांकलाई आधार मान्ने हो भने नाइन एन–एकेएक्सबाट मात्र निगमले ९० दिनमा एक अर्ब तीन करोड रुपैयाँ आम्दानी गुमाइसकेको छ ।

निगमका प्राविधिक प्रवक्ता देवेन्द्र पुनले मार्च पहिलो साता जहाजको मर्मत सकाएर जहाज ल्याउने तयारी भइरहेको बताउँछन् । मर्मतको काम भइरहेको र अन्तिम चरणमा रहेको प्रवक्ता पुनले बताए ।

पुनका अनुसार, कम्पनीले मार्च पहिलो साता मर्मत सकाएर रिलिज गर्न जानकारी दिएको छ ।  जहाजको इन्जिन मर्मत ढिलाई किन भएको हो भन्ने प्रश्नमा पुनले जहाज मर्मत गर्न कम्पनीसँग सामान उपलब्ध नहुँदा समयमा मर्मत हुन नसकेको बताए । 

“इजरायल वार जोनमा प¥यो, अनि बाहिरबाट सामान सप्लाई हुन सकेन,” प्रवक्ता पुनले भने, “त्यसले गर्दा मर्मतमा ढिलाई भएको हो ।”

निगमले उक्त जहाजको इन्जिन मर्मतका लागि इजरायलको आईएआई कम्पनीसँग सम्झौता गरेको छ ।  सम्झौतापश्चात् मर्मत गर्न सेप्टेम्बर १७ मा इन्जिन इजरायल पठाएको थियो । इन्जिन मर्मत गर्न पठाएको फागुन १५ गतेसम्म  १५४ दिन पूरा भएको छ । 

तर, आईएआईले अझै पनि उक्त इन्जिन मर्मत गर्न गरेको छैन । इन्जिन मर्मत गर्न ४५ देखि ९० दिनभित्रमा गरिसक्नुपर्ने हुन्छ । तर, १५४ दिनसम्म पुग्दा निगमको इन्जिन मर्मत हुन सकेको छैन ।

इन्जिन मर्मत किन हुन सकेन ? भन्ने विषयमा जवाफमा निगमले मर्मत जारी रहेको बताउँदै आएको छ । समयमा जहाज मर्मत नगर्ने कम्पनीविरुद्ध कानुनी उपचार जाने÷नजाने भन्ने विषयमा पनि अन्योल देखिएको छ । 

भाडाको इन्जिनमा कमिसनको खाने प्रवृतिले निगम व्यवस्थापनले इन्जिन मर्मतमा चासो नदिएको निगमका एक कर्मचारीले बताए ।निगमले जुन कम्पनीलाई इन्जिन मर्मत गर्न दिएको थियो । त्यही कम्पनीबाट भाडामा इन्जिन ल्याएर उडान गरिरहेको छ । 

भाडाको इन्जिनका निम्ति दैनिक दुई हजार अमेरिकी डलर तिुर्नपर्ने हुन्छ । कम्पनीलाई जति भाडाको इन्जिन जति लम्ब्याउदै गयो, त्यति नै फाइदा हुन्छ । त्यसमा निगम व्यवस्थापनले पनि कमिसन पाउने गरेको निगम एक कर्मचारी बताउँछन् । निगमले आजसम्म भाडा इन्जिनबाट मात्र फागुन १५ गतेसम्म तीन लाख आठ हजार अमेरिकी डलर तिर्नुपरेको छ ।