काठमाडौं । उपप्रधान तथा रक्षामन्त्री पूर्णबहादुर खड्काले हरेक बजेटमा कर्णालीलाई प्राथमिकता दिएको दाबी गरेका छन् । सोमबार कालिकोटको सुनथराली विमानस्थल उद्घाटन कार्यक्रममा उनले कर्णालीको प्रदेशको समस्याबारे आफू जानकार रहेको बताए ।

उनले शिक्षा, स्वास्थ र पूर्वाधारको विकासमा सबै दलहरू एकजुट हुनुपर्नेमा जोड दिए । “कर्णालीको विकासमा राजनीति गर्न हुँदैन । सबै मिलेर कर्णालीको विकासमा हातेमालो गरौँ । कर्णाली राजमार्ग, भेरी करिडोर, मुगुका प्रमुख सडकहरू निर्माण गर्नेदेखि विद्युत् उत्पादनका क्षेत्रका कामहरूमा पनि सबैले हातेमालो भएर लाग्नुपर्छ,” उनले भने । 

उपप्रधानमन्त्री तथा रक्षामन्त्री खड्काले कालिकोटको शिक्षा, स्वास्थ्य, पूर्वाधार  र यातायाततर्फको विकासमा सबै दल एकजुट हुनुपर्ने बताए । मुलुकमा विमानस्थल कम भए पनि जहाजको सेवा कालिकोटका गरिब जनता, सुत्केरी महिला र बृद्धबृद्धाहरूका लागि सहयोगी हुने उनको भनाइ थियो ।

जहाजमार्फत कालिकोटको पर्यटन, कृषि र अन्य विकासमा सरकारले सहयोग गरिरहेको खड्काको भनाइ थियो । १०–१५ वर्षमा कर्णालीलाई समृद्ध प्रदेश बनाउन सकिने बताउँदै त्यसका लागि सबैले मिलेर काम गर्नुपर्नेमा जोड उनले दिए ।