काठमाडौं । स्मार्ट ड्राइभिङ लाइसेन्सबारे सांसदले प्रश्न गरेका छन् । सोमबार प्रतिनिधिसभा बैठकमा सांसद असिम शाहले आफूसँग भएको ड्राइभिङ लाइसेन्स देखाउँदै ‘यो कसरी स्मार्ट भएको हो ?’ भनी प्रश्न गरे ।

एक लाखप्रति नक्कली लाइसेन्स जारी गरिएको भन्दै उनले अख्तियार दुरुपयोग अनुसन्धान आयोग र सीआईबीले अनुसन्धान गरिरहेको उल्लेख गरे ।

जर्मनीबाट १२ लाख कार्ड खरिद गरिएको तर भेरिफिकेसन नमिल्दा ६ लाख छाप्न नसकिएर फिर्ता आएको उनको भनाइ छ ।

मद्रास सेक्युरिटी प्रेसले ४० हजार डलर थपे छाप्न मिल्ने भनेको उनले बताए । उनले कार्ड एउटा देशबाट ल्याउने र छाप्न अर्काेमा दिने कार्य रोक्नुपर्नेमा जोड दिए ।

सांसद शाहले भने, “यो कस्तो स्मार्ट लाइसेन्स हो ? जनता आफैँ स्मार्ट भइसकेका छन् । यो प्रिन्ट गर्ने काम बन्द गरौँ । लाइसेन्सका लागि पर्खिनुपर्ने समय अन्त्य गरी यो महाजात्रा रोकौँ ।”

अर्का सांसद उदयशमशेर जबराले स्मार्ट लाइसेन्स पाउन २१ महिना लाग्ने बताए । उनले सन् २०२२ अक्टोबरमा नवीकरण गर्न दिएको कार्ड हालसम्म नपाएको जानकारी गराए ।

“एक दिनमा १,६८० कार्ड प्रिन्ट गर्न सकिन्छ । सरकारले नचाहेका कारण नभएको हो । लाइसेन्स रिन्यु गर्न एक दिन ढिलो भए डबल फाइन तिर्नुपर्ने स्थिति छ । यसमा सरकारको ध्यान जाओस्,” उनले भने ।