काठमाडौं । कोसी प्रदेशसभाको दोस्रो कार्यकालमा हालसम्म आठ विधेयक पारित गरिएको छ ।

गत वर्षको पुस १७ गते प्रदेशसभाको पहिलो अधिवेशनको पहिलो बैठक बसेको थियो । त्यसयता पाँच सरकार गठन र दुईपटक सभामुख निर्वाचन गरिएको छ ।

कोसी प्रदेशसभाको दोस्रो कार्यकालको पछिल्लो १४ महिनाको अवधिमा चार प्रदेशसभा अधिवेशन सम्पन्न हुँदा जम्मा ४६ बैठक बस्यो । जसमा ११ विधेयक दर्ता गरियो । तीमध्ये आठ विधेयक प्रमाणीकरण गरिएको छ । तीन विधेयक निष्क्रिय भएको प्रदेशसभा सचिवालयले जनाएको छ ।

कोसी प्रदेशसभामा प्रतिवर्ष २० करोड ५४ लाख रुपैयाँको हाराहारीमा खर्च हुने गरेको छ । प्रदेशसभाको पहिलो पाँच वर्षमा जम्मा एक अर्ब दुई करोड ७० लाख ३४ हजार रुपैयाँ खर्च भएको प्रदेशसभा सचिवालयले जनाएको छ । यसमा प्रदेशसभा सदस्य, सचिवालयका कर्मचारी, स्वकीयसचिव, कार्यालय सञ्चालनजस्ता चालु प्रकृतिका खर्च समावेश छन् ।

प्रदेशसभा सचिवालयका सूचना अधिकारी निरोज ढकालले हिउँदे अधिवेशनमा १३ बैठक बस्दा तीन विधेयक दर्ता भएकामा दुईवटा पारित गरिएको बताए । यस अधिवेशनमा प्रदेश निजामती सेवाको गठन, सञ्चालन र सेवाका सर्तहरू सम्बन्धमा व्यवस्था गर्न जारी भएको अध्यादेशलाई प्रतिस्थापन गर्न बनेको विधेयक र केही प्रदेश ऐनलाई संशोधन गर्न जारी भएको अध्यादेशलाई प्रतिस्थापन गर्न बनेको विधेयक पारित हुँदा प्रचलित प्रदेश ऐनमा प्रदेशको नाम संशोधन गर्न बनेको विधेयक निष्क्रिय बनेको थियो ।

यसैगरी, बजेट अधिवेशनमा ६ बैठक बस्दा दुई विधेयक दर्ता भएकामा एउटा प्रमाणीकरण भयो । प्रचलित प्रदेश ऐनमा प्रदेशको नाम संशोधन गर्न बनेको विधेयक सर्वसम्मतले पारित भई प्रमाणीकरण भएपश्चात् साविक प्रदेश नम्बर–१ लाई विस्थापित गरी सबै ऐनमा कोसी प्रदेश कायम भएको थियो । तर, स्थानीय सेवाको गठन, सञ्चालन र सेवाका सर्तहरू सम्बन्धमा व्यवस्था गर्न जारी भएको अध्यादेशलाई प्रतिस्थापन गर्न बनेको विधेयक निष्क्रिय बनेको सचिवालयले जनाएको छ ।

तेस्रो अधिवेशनमा पाँच बैठक बस्दा चार विधेयक दर्ता भएकामा दुई विधेयक पारित गरिएको थियो । यस अधिवेशनमा प्रदेश निजामती सेवा ऐन, २०७९ लाई संशोधन गर्न बनेको विधेयक र स्थानीय सेवाको गठन, सञ्चालन र सेवाका सर्तहरू सम्बन्धमा व्यवस्था गर्न बनेको विधेयक पारित गरिएको सूचना अधिकारी ढकालले जानकारी दिए ।

आ.व. ०८०/८१ को सेवा र कार्यका लागि प्रदेश सञ्चित कोषबाट केही रकम विनियोजन र खर्च गर्ने सम्बन्धमा व्यवस्था गर्न बनेको विधेयक निष्क्रिय भएको उनले बताए ।

२३ बैठक बसेर सकिएको चौथो अधिवेशनमा तीन विधेयक दर्ता भएकामा सबै पारित गरिएको सूचना अधिकारी ढकालले जानकारी दिए । न्युज एजेन्सी नेपाल