काठमाडौं । सत्तासाझेदार दल नेपाली कांग्रेसका सांसद श्यामकुमार घिमिरेले सांसदले दिएको सुझावका आधारमा बजेट बनाउन सरकारलाई दबाब दिएका छन् । आइतबार प्रतिनिधिसभा बैठकमा उनले सांसदका योजनालाई कटाएर सरकारले आउँदो आर्थिक वर्षको बजेट ल्याए आफूहरूलाई मान्य नहुने समेत बताए ।

सांसद घिमिरेले आउँदो बजेटका निम्ति तत्काल प्रिबजेट छलफल गराउने अडानबाट पछि नहट्न प्रधानमन्त्री पुष्पकमल दाहाल ‘प्रचण्ड’को ध्यानाकर्षण गराए ।

“...हामी जननिर्वाचित भएर आउँदै गर्दा जनतासँग जुन आश्वासन दिएका छौँ, तिनलाई कैँची लगाएर काट्ने अधिकार सरकारलाई छैन । उहाँहरू जसरी निर्वाचित भएर आउनुभएको हो, त्यसैगरी हामी पनि निर्वाचित भएर आएका हौँ,” उनले भने, “हाम्रा कुराहरू पनि बजेटमा राख्नुपर्छ भन्ने कुरा राख्न चाहन्छु ।” न्युज एजेन्सी नेपाल