![एक हजार ७८ दिनपछि च्याम्पियन्स लिगको नकआउट चरणमा बार्सिलोनाको गोल](https://12khari.top/uploads/posts/barsilona-1708601231.jpg)
काठमाडौं । स्पेनिस ला लिगा च्याम्पियन बार्सिलोनाले एक हजार ७८ दिनपछि यूईएफए च्याम्पियन्स लिगको नकआउट चरणमा गोल गरेको छ । जाभी हर्नान्डेजको प्रशिक्षणमा बुधबार राति इटालियन क्लब नापोलीविरुद्ध च्याम्पियन्स लिग प्रि–क्वार्टरफाइनलको पहिलो लेगमा गोल गरेको हो ।
नापोलीको मैदान डियागो अर्मान्डो म्याराडोना रंगशालामा भएको खेलमा बार्सिलोनाको रोबर्ट लेवान्डोवस्कीले ६०औँ मिनेटमा गोल गरेका थिए । योसँगै लेवान्डोवस्की अर्जेन्टिनी कप्तान लियोनल मेसीले क्लब छोडेयता बार्सिलोनाबाट च्याम्पियन्स लिगको नकआउट चरणमा गोल गर्ने पहिलो खेलाडी बने ।
यसअघि मेसीले २०२१ को मार्च ११ मा च्याम्पियन्स लिगको प्रि–क्वार्टरफाइनलमा फ्रेन्च क्लब पेरिस सेन्ट जर्मन (पीएसजी) विरुद्ध गोल गरेका थिए । सो सिजनको अन्त्यसँगै मेसी पीएसजीमा अनुबन्धित भएपछि बार्सिलोना च्याम्पियन्स लिगको नकआउट चरणमा प्रवेश गर्न सकेको थिएन ।
बुधबारको पहिलो लेगमा १–० को अग्रता जोगाउन नसक्दा नापोलीसँग बार्सिलोना १–१ को बराबरीमा रोकिएको थियो । यी दुई टिमबीचको दोस्रो लेग मार्च १३ मा हुनेछ ।