काठमाडौं । एकदिवसीय शृंखलाको अन्तिम खेलमा क्यानडा–११ सामु नेपाल ‘ए’ले १८२ रनको लक्ष्य प्रस्तुत गरेको छ । 

बिहीबार मूलपानीस्थित क्रिकेट मैदानमा टस हारेर ब्याटिङमा आएको नेपाल ‘ए’ ले ४६.५ ओभरमा सबै विकेट गुमाएर १८१ रनको योगफल खडा गर्‍यो ।

नेपालका ओपनर आशुतोष घिरैयाँले सर्वाधिक २८ रन बनाए । यसअघिको दोस्रो खेलका ओपनर मयन यादवको स्थानमा आज मौका पाएका आशुतोषले ४३ बलमा पाँच चौका प्रहार गरे । आशुतोषले पहिलो विकेटका लागि अर्जुन कुमालसँग ५४ रनको साझेदारी गर्दै नेपाललाई राम्रो सुरुआत दिलाएका थिए । अर्जुनले ५३ बलमा दुई चौकासहित २७ रन थपे । 

यसबाहेक, बसिर अहमेदले २५, कप्तान सन्दीप जोराले २४, सुजन थपलियाले २४ र प्रतिश जिसीले १९ रन जोडे । 

क्यानडाका डिलोन हाइलिजर, हर्ष थाकेर र निकोलस किर्टोनले समान दुई विकेट लिए । कलिम साना र कप्तान साद बिन जफरले एक–एक विकेट हात पारे । तीन खेलको शृंखला १–१ को बराबरीमा छ । आजको खेल जित्ने टिमले शृंखलाको उपाधि पनि जित्नेछ ।